Manera cu 24ora.com a yega di informa caba y cu diaranson, director di Utilities NV, Richard Eman, a confirma cu no tin hopi confiansa mas den e directornan di WEB Aruba NV.
E motibo dicon kier kita e dos directornan aki awo no ta conoci. Locual si nos di 24ora sa ta cu for di masha tempo caba, for di Utilities Aruba NV tabata sinti e necesidad pa manda ambos director di WEB Aruba NV cas. Situacion ta basta tenso den WEB, te cu Eman a uza e termino ‘awa a pasa hariña’.
Dia 22 di juli ultimo, lo mester tabata tin un reunion pa atende cu e asunto delicado aki, pero tabata e propio directornan di WEB cu a pidi pa pospone e reunion aki. Eman a sigui bisa cu, mientras cu tin asunto importante pa atende cu ne den WEB, e dos directonan a opta pa bay cu vakantie y esaki sigur no a cay den bon tera cerca director di Utilities NV. A duna ambos director un periodo extra y siguiente reunion lo tuma luga dia 2 di augustus proximo. Motibo pa cual no tin confiansa mas den ambos directo, no ta conoci y Eman a prefera di no duna mucho detayes.
Ta prefera di papia prome cu e dos directornan pa despues bay mas den detayes ariba e asunto aki. Mester conclui kico ta posicion di e directornan di WEB.
El a bisa cu e no por anticipa kico lo bay pasa despues di dia dos di augustus proximo.
Al parecer, director financiero di WEB, Randolph Anthony Ruiz, lo a ‘ruim op’ su oficina, cual ta duna indicacion cu e lo no bolbe mas. Pero riba e noticia aki tampoco Eman no kier a bisa nada. El a limita su mes na bisa cu e “no sa di nada, cu Ruiz a ruim op su oficina”.
Lo sigui e noticia aki di cerca den e dianan cu ta sigui pa asina trece tur informacion pa e lectornan di 24ora.com