No ta solamente comete un delito por garantisa bo detencion. Na momento cu bo no tin un permiso di estadia valido y ta envolvi den un accidente tambe por costa bo, bo libertad. Esaki ta exactamente locual a sosode diaranson atardi alrededor di 5:25 pm.
Ta trata di un homber cu tabata envolvi den un desgracia di auto riba Caya Ernesto Petronia. Mucho detaye di e accidente no tin, un cos ta sigur, ora e specialista di trafico a puntr’e pa su rijbewijs, e no por a demonstra uno valido y tampoco un permiso di estadia riba nos isla.
Ora cu e transporte policial a yega warda di polis situa den Wilhelminastraat, a puntr’e sospechoso si e tin un permiso valido, el a confirma cu un bos hopi abou: “No.”
Tambe a puntr’e si su permiso ta den proceso na DIMAS, tambe el a contesta cu “no” y el confirma cu e auto cu e tabata stuur, no ta di dje. Despues cu un subfiscal a atende cu ne na warda di polis, a traslad’e pa Guarda Nos Costa pendiente deportacion.