Fraccion di AVP a reuni diamars atardi na representacion di Hulanda cu Secretario di Estado Knops, kende ta riba un bishita cortico na Aruba.
Miembro di fraccion di AVP, mr drs Richard Arends a mustra cu a atende diferente aspecto importante, principalmente presencia di CAFT y su prolongacion di su permanencia na Aruba, como tambe e falta di un maneho financiero-economico. Sr Arends a mustra cu ainda no a yega na un acuerdo entre gobierno di Aruba y Hulanda pa loke ta trata un cuadro financiero nobo. Negociacionnan entre gobierno y Hulanda ta andando aunke cu nos a manda pidi por escrito na minister di finansa pa duna nos un splicacion di kico ta e acuerdonan y bou di cual condicion ta yega na un acuerdo y gobierno no a duna claridad riba esaki,”
“Nos a reuni como fraccion di oposicion cu Sr Knops y nos a trece esaki dilanti . Parlamento no tin conocemento kico ta e palabracionnan cu a yega na dje ya cu gobierno no a duna claridad ainda pa loke ta trata esaki y ta algo cu nos ta lamenta.
Nos por a tuma nota si di consehonan di CAFT cu pa 2018 mester baha ainda un suma di 12 miyon florin pa loke ta gasto di personal pero ainda no tin claridad riba esaki, maske cu a manda pidi esaki por escrito.
Nos a constata cu CAFT a wordo prolonga over di e termino di e gobernacion aki, mientras cu CAFT originalmente tabata un colegio di supervision te cu aña 2018 caminda mester a yega na un surplus.
E aumento di gastonan fuera di gastonan personal, tambe gastonan di oficina, no a permiti gobierno pa yega na e norma stipula. Esaki no ta hustifica e ‘crisisheffing’ cu a drenta na vigor pa luna di juli, cu lo afecta e poder di compra di e ciudadano pero tambe lo afecta e empresario chikito, negoshinan chikito. Un ley cu a pasa ciegamente, no tabatin consulta, no tabatin analisis y tiki tiki nos por mira e efecto di esaki.
Nos ta lamenta cu e no ta soluciona e retonan financiero pero juist ta extende esaki un poco mas y ta extende tambe e periodo pa yega na un balanced budget,” Parlamentario Richard Arends a declara.
Riba un pregunta con AVP lo tabatin como solucion na luga di e crisisheffing, e parlamentario a mustra cu claramente cu AVP lo no a aumenta gastonan cu 125 miyon na 2018 si compara esaki cu realisacion di 2017. Proyectonan di PPP a forma parti di e maneho di gobierno di AVP y e cuadro financerio riba termino largo, pues no tabatin mester di un espacio adicional pa e gastonan nobo cu e gabinete actual si a presupuesta y no tabatin mester di un crisisheffing tampoco pa financia esaki. Pa loke ta e decisionnan cu gobierno ta tumando, fraccion di AVP tambe a atende cu Secretario di Estado mustrando cu e medidanan di gobierno ta afecta e poder di compra di e ciudadanonan y esaki lo tin su influencia riba economia. Efectonan economico negativo lo tin su efectonan riba finansa publico, pasobra si no por logra e crecemento economico cu gobierno kier, bo no por logra e entradanan di gobierno tampoco.
“Cada florin cu wordo kita for di e ciudadano, cada florin cu kita for di e comerciante, ta un florin menos cu e tin pa gasta, ta un florin menos cu ta lora den nos economia y e parti cu ta coresponde Gobierno lo no yega den caha.” Parlamentario Richard Arends a conclui.
