Prome Minister Evelyn Wever-Croes a cuminsa cu e rueda di prensa di diahuebs, anunciando e plan di e maneho pa cobra pa recogemento di sushi, cu mester a drenta na vigor dia 1 di Juli 2018, a tuma e decision cu lo pospone pa dia 1 di Januari 2019 y pa asina duna un paro transitorio.
Gastonan di Personal
Un otro punto cu e prome minister a atende ta e gastonan di personal. Tin un parlamento cu gusta wordo bon informa y kier keda na altura di kico ta andando. Parlamento a manda yama e minister den un reunion publico. Diaranson e tabata eynan pa splica kico ta locual cu ta deliberando cu Hulanda riba dje. Esaki despues cu ora cu CAFT a menciona cu Aruba mester baha gastonan di personal cu 12 miyon, el a causa un poco confusion y el a causa bastante rumor cu si ta bay kita centenares di hende for di trabao.
Diaranson e tabata den parlamento y tin cu bisa un parlamento critico y cu a haci hopi pregunta y kier sa exactamente kico ta pasando. Prome minister a splica e plan di gobierno, a splica kico ta e plan financiero y cu e meta ta pa otro aña ta pa baha e deficit asina tanto cu lo tin un deficit di 0.5%, cual ta 25 miyon. E aña siguiente e tin cu bira un surplus di 25 miyon y e siguiente aña di 50 miyon. Asina poco poco ta saca Aruba for di e deficitnan y ta yega na un surplus.
Loke e meta ta, ta pa baha e debenan nacional, pasobra e debenan ta casi 90 miyon y ta stroba economicamente, financieramente, ta stroba nos stabilidad financiero y economico. Pa por logra esaki mester baha e deficitnan y den e plan, manera cu a splica parlamento, na aña 2027 lo logra baha e debe na 70% y na 2039 logra bah’e na 90%.
CAFT
Tambe prome minister a trata e supervision di CAFT y cu probablemente lo bay yega na otro, dunando CFT ainda 3 aña na Aruba, mientras tanto cu ta cuminsa mesora cu e Begrotingskamer, pa asina e gana confiansa y experiencia y asina, una bes cu ta cla cu CAFT y CAFT ta bay stop di existi, e ora tin un propio organo di supervision, cu ta duna suficiente stabilidad y conocemento.
Pa por logra e deficitnan cu tin den mente, pa logra baha e debe na aña 2039, aki 21 aña e debe por fin yega na 50%, e ora awe tin cu cuminsa tuma e decisionnan.
Esey ta algun di e puntonan cu prome minister a trata den parlamento diaranson.
