RED na Sue-Ann Ras: Bay gaña baca!

Den un declaracion cu lider di RED Ricardo Croes a duna dia 6 di juli ultimo, e ta desabarata poniencianan treci dilanti door di Sue Ann Ras, di loke cu a sosode den un reunion di Eerste Kamer ora cu e tabata mirando Nexflix enbes di sigui e reunion.

Den su declaracion Ras a bisa cu Ricardo Croes tabata papiando ora cu el a bay riba Nexflix, ya cu e tabata sa contenido caba di e discurso. Pero Croes den su declaracion na radio a bisa cu momento cu Ras tabata mira e pelicula, esnan cu tabata hiba palabra tabata Bosman y Hirsch Ballin. Inclusive, e ta bisa, riba e grabacion haci door di e periodista, por mira su persona sinta dilanti di Parlamentario Sue Ann Ras. “Niun momento tin un grabacion cu ta mustra cu sra ta mira Designated Survivor ora cu mi persona tabata papiando.

Esey no tabata berdad. Y ora cu el a papia, e tabatin e pensamento cu Aruba lo no haya apoyo pa e documento cu a wordo presenta na 2015, cu tabata e forma original. P’esey el a lanta dado momento pa papia di e documento di Profesor Arian. E mes ta bisa cu na e momentonan ey e tabata hopi emociona pensando cu no ta bay logra loke tabata kier, loke a keda aproba na 2015. “Pero obviamente sra Ras tabata mira hopi Designated Survivor y e pober no tabatin ningun idea di kico tabata pasando y el a bay gaña tur hende cu e no ta scucha sr. Croes.”

Croes a pasa audio di un pida unda ela expresa su preocupacion y na final por scucha Ras expresa “huh”. “Boso a scucha e “huh”? Esey ta sra. Ras despues cu Ricardo Croes a caba di papia. Of sra. Ras lagami puntrabo. Esey tabata Designated Survivor? Bay gaña baca. Esaki ta e problema cu nos tin aki. Hendenan sin integridad cu ta tribi di wak Netflix den Eerste Kamer, ta tribi di gaña prensa, duna excusananfofo, pone su partido y su fraccion, pone full e delegacion Arubano, Aruba y e islanan Caribense nan cara na berguesa. Sra. Ras tuma e honor y entrega e asiento ey. No haci cu e ta dibo y bay bo cas. Esaki ta un di e miho cosnan pa bo haci,” esaki tabata parti di e declaracion di Parlamentario Ricardo Croes di RED na radio.