Diahuebs 10 di augustus 2017 na Cas di Cultura Aruba a tuma luga e final di e edicion # 11 di e Competencia Hubenil Gang di Arte Aruba 2017, cu tema oficial caya.
Esaki tabata un anochi hopi exitoso mirando e calidad treci dilanti di cada un di nan presentacion den e cual e hobennan a profila nan talento den diferente disciplina artistico, entre otro teatro, musica, rap, baile, arte visual, audio visual, solo danza, solo performance, obra interdisciplinario y multidisciplinario.
Tabatin un tremendo y energetico apertura na unda tur participante y invitadonan special a presenta oficialmente, pa sigui cu un total di 20 presentacion ariba stage na unda e hobennan por a trece dilanti nan vision artistico y reflexion na base di e tema central cu tabata “caya”
Na final di e delaster presentacion di e hobennan cu a participa pa e competencia 2017, e publico por a disfruta di un tremendo presentacion di e delegacion di invitadonan di honor cu ta trata di hobennan talentoso di nos rumannan isla di Corsow y Bonaire. Ganadonan di Luna Yen cu participacion di Jesmiel Marchena y Jhuriel Plantijn cu lider Lilimar Valencia, Como Hobennnan di “Bonaire Youth Outreach Foundation” cu participacion di Cassius Rosario, Richmend Anthony, Jeremy Pikerie, Jorge Gonzales y Caroline Porras, como lider Segni Bernadina cu lo tabata t’ey presente pa brinda Aruba un demostracion di nan expresion y creatividad.
Ta di remarca cu tambe nos hobennan ganado, lo representa Aruba durante di diferente actividad y intercambio artistico tanto local como internacional, entre otro e intercambio cu nos ruman isla Corsou cu e proyecto cu ta hiba como nomber “Luna Yen” y “Bonaire Youth Outreach Foundation”.
Pa loke ta trata Aruba e aña aki, ta di remarca cu un biaha mas, mayoria di participante tabata nan prome biaha cu nan a forma parti di e competencia y ta di aplaudi cu nan a tribi di subi escenario pa mustra nan talento y haci un excelente presentacion y e hobennan di edicionnan anterior cu ya nan ta grandi y reconoci den nos comunidad, a sa di profila un biaha mas pero como maestro di ceremonia y cuerpo di hurado. E hobennan tin na palabra y nan kier expresa, y Gang di Arte ta e plataforma pa hunto nos por sigui crece y destaca.
Departamento di Cultura Aruba den nomber di Ministerio di Cultura Aruba ta felicita tur participante pa un excelente trabao, na e maestronan cu a guia e proceso, cuerpo di hurado, tecniconan di Cas di Cultura, sin lubida Seccion di Implementacion pa un otro exito di un tremendo proyecto manera ta Competencia Hubenil Gang di Arte Aruba cu ta sigui resalta talentonan nobo, bou di nos hobennan, stimula pa mas amor pa arte, sigui traha riba disciplina artistico pa por garantisa y ofrece calidad y subi di nivel di presentacion, como sigui motiva pa e proyecto por sigui crece den interes, calidad y participacion.
Danki na tur persona cu a duna nan granito di arena y cu a contribui grandemente durante di e 11 edicion di un proyecto cu ta sigui crece y hala atencion di e hobennan cu ta asina entusiasma y cu gana pa comparti nan talento, energia, pensamento y potencial artistico.
Esaki tabata e Resultado Final Competencia Hubenil Gang di Arte Aruba 2017, edicion number 11 cu tema oficial “Caya”:
Na di 5 luga Rap, cu 1905 punto: e duo BMT, Zef Kerr aka Lil Zi Brandon Kerr aka B boy killah.
Na di 4 luga Rap, cu 1995 punto: Erwin Huges aka Ziggz.
Na di 3 luga Baile, cu 2015 punto: e duo 297 Crew cu Andrisca Nicolas & Anaïsa Orman.
Na di 2 luga Rap, cu 2055 punto: Ty-rique Philips aka Lil Ty.
Ganado absoluto na prome luga, arte multidisciplinario, cu 2165 punto: Grupo RCM consisti di Jean Paul Salcedo, Cy-Anne Simmons y Shjakayne Manuela.
Departamento di Cultura Aruba, y Comision Organisado ta felicita tur e ganadonan di Competencia Hubenil Gang di Arte Aruba 2017. Masha pabien y danki. Hopi exito y bendicion na tur participante.
