For di 6 pa 8 maart 2023 dos representante for di UNESCO-Paris tabata di bishita na Aruba. Su Excelencia Monique van Daalen, Representante Permanente di Reino na UNESCO-Paris, hunto cu su suplente Carlien Schrijvershof. Esaki ta e prome biaha cu e Representante Permanente di Reino Hulandes na UNESCO-Paris a bishita Aruba den un funcion aki.
Intencion di e bishita aki primordialmente tabata pa cera conoci cu e trabao di UNESCO na Aruba y tambe pa informa e ministernan concerni cu e aña aki na november ta tuma luga e Conferencia General di UNESCO, unda ta sumamente importante pa Reino Hulandes ta bon representa y prepara. Parti di e preparacion ta encera pa traha conhuntamente riba e documento ‘Koninkrijksinstructie’ den cual ta describi e prioridadnan y maneho pa un periodo di minimo tres aña. Secretariado di Comision Nacional pa UNESCO di Aruba a compaña van Daalen y Schrijvershof na e diferente encuentronan cu nan tabatin na Aruba.
Banda di a bishita e Gobernador di Aruba, a bishita tambe e minister encarga cu asuntonan di UNESCO, Minister di Finansas y Cultura, y vice-prome Minister di Aruba, Ursull Arends, kende a reemplasa prome minister cu tabata den exterior pa reunion di Nacionnan Uni.
E delegacion a reuni cu ‘Directie Buitenlandse Betrekkingen’ pa discuti e proceso di concipia y finalisa e ‘Koninkrijksinstructie’. E organisacionnan cu e delegacion a bishita tabata Basisschool Prinses Amalia (UNESCO-School), Museo Archeologico Nacional di Aruba (MANA), Museo di Industria na San Nicolas y Fundacion Parke Nacional di Aruba (FPNA). E delegacion a bishita tambe Spaans Lagoen cu ta un sitio natural di hopi interes historico/arkeologico y di ecologia.
Van Daalen a keda impresiona cu e trabounan cu ta tumando luga na e diferente organisacionnan y tabata sorprendi di e coherencia entre e diferente areanan di trabao. E plan Strategico 2023-2032 di FPNA y su ehecucion bou di guia di su directora, Natasha Silva ta un tremendo ehempel di con por transforma un organisacion, mientras cu ta transforma tambe mentalidad di stakeholders envolvi. Pa van Daalen y Schrijvershof e bishita den naturalesa di Aruba tabata e parti di e programa cu mas nan a encanta.
Tabata un honor pa UNESCO-Aruba por a ricibi dos hende muhe den funcionnan sumamente responsabel na nivel internacional di UNESCO na Aruba riba Dia Internacional di Hende Muhe, cu tambe ta un dia cu UNESCO ta promove.
