Cuater scol di San Nicolas lo participa den marcha cultural

Diahuebs proximo, dia 16 di maart, cuater scol di San Nicolas lo bini hunto pa asina gosa den e gran marcha cultural en conexion cu Dia di Himno y Bandera.

Na 2018, e idea a nace pa bin cu algo nobo relaciona cu e celebracion di Dia di Himno y Bandera y un docente a sugeri pa St. Paulus School subi caya pa demostra nos sentimento patriotico, a traves di un marcha pasando den e cayanan di San Nicolas.

Via Roderich, di Massive Brassband, a train algun mucha pa toca drums y asina a marcha den e cayaann di San Nicolas, cu a bay hopi bon. Na 2019, un biaha mas a organisa e marcha cultural un biaha mas, hunto cu Colegio Santa Teresita, cu a hacie mucho mas grandi.

E aña aki, despues di tres aña, un biaha ta bin cu e Marcha Cultural, den su di tres edicion. Nan tabata tin hopi mas tempo pa prepara y ta bin compaña pa tres scol: Colegio Santa Teresita, Pasadia Briyo di Solo, Scol Caiquetio.

Bou di e tononan di musica tipico, e marcha lo sali for di e speelplaats di St. Paulus School. Nan lo bay direccion west riba Pastoor Hendrikstraat, na altura di Pasadia Rayo di Solo, nan ta drenta Torenstraat, unda cu e muchanan di Pasadia Rayo di Solo lo uni nan mes n’e parada. Lo sigui riba e mesun ruta di Parada di Mucha, unda cu lo sigui pa Caya Dick Cooper, bira drenta B.vd. Veen Zeppenfeldstraat, Caya Captain Rodgers, Lagoweg, sigui bay te Carnaval Village, bira pa drenta bek den Pastoor Hendrikstraat pa bay bek St. Paulusschool.