Ku un karta, frakshon di PIN ta aserka minister enkargá ku Enseñansa, Siensia, Kultura i Deporte, relashona ku e siguiente 2 preokupashonnan. 1.“spelling chek digital” di nos dushi idioma papiamentu.
E “spelling chek digital” di aña 2010 bai ariba, di nos idioma papiamentu no ta funshoná bon i tin diferente eror. E “spelling chek digital” di 2007 ta funshoná muchu mas mihó. 2. No tin un “spelling chek digital” na papiamentu pa tur e asesorionan moderno di awendia manera, tabled, etc. Etc.
Riba paginá 18 di akuerdo di gobernashon tin skirbi lo siguiente:
Kultura ta base pa desaroyo di un komunidat. E ta alabes un instrumento importante pa edifikashon di pais (‘nation building’). Den e kuadro aki e afan di gobièrnu ta pa yuda desaroyá siudadanonan i famianan fuerte, responsabel, konsiente, kapas i dispuesto pa kontribuí na desaroyo di nos pais. Gobièrnu ta di opinion ku ta di vital importansia pa fortifiká e balor propio di nos hendenan. Solamente ku konosementu di su historia i kultura, e siudadano por skohe konsientemente pa e kosnan ku ta hasié fuerte, i asina realisá e nashon ku e ke.
Adishonal ta bin aserka ku den e aña aki nos idioma papiamentu a subi mapa internashonal i ta wòrdu investigá dor universidatnan internashonal. Tambe e skol SKAIH a kuminsá ku sosten di gobièrnu mes ku e parti pre-universitario. Tur e esfuersonan ariba menshoná ta enbano si nos no laga drecha e “spelling chek digital”, debí ku komo konsekuensia esaki lo sòru pa trese bruashon den skirbimentu i pronunsiashon di nos idioma.
Den kuadro di e preokupashon ariba menshoná i e importansia pa komunidat uza nos idioma di forma korekto, frakshon di PIN tin e siguiente preguntanan na minister.
- Sra. Minister ta na altura di e preokupashon ariba menshoná?
- Sra. Minister ta mira e importansia di esaki?
- Sra. Minister ta dispuesto na laga koregí i o traha unu ku si ta funshoná di forma korekto?
Sra. Minister ta dispuesto na laga traha “spelling chek digital” na papiamentu ku por funshoná den tur tipo di asesorionan moderno?