Definitivamente e trahadonan di KIA, cu ta miembro di sindicato TOPA, no ta contento con e procedura di nombracionnan interno ta tumando luga den e instituto coreccional di nos pais, esta KIA. Ta un di e puntonan cu TOPA a pone presion pa algun tempo caba.
Rene Bernabela, presidente di TOPA, a menciona despues cu nan a sali for di un reunion na ATIA, caminda cu nan a reuni cu un delegacion representando e ministerio di asuntonan interior y asuntonan di reino, cu e parti di KIA, e ‘plaatstingprocedure’, esta e procedura di nombracion, no a cana bon. Awe merdia sindicato TOPA lo tin reunion cu Minister di Husticia, Rocco Tjon, pa papia riba e topico di e procedura aki. A sinta y a dedica tempo y esfuerso, unda cu a bin cu regla di wega pa loke ta e parti aki. Sinembargo a bin ripara na final, na momento cu a cuminsa cana riba e procedura di e comision encarga, toch tin cos cu a bay robes, cu pa TOPA no ta aceptabel.
Bernabela a comenta di a tuma un decision e ora pa atende cu e asunto aki awe merdia cu minister di husticia, mirando cu esaki ta algo inaceptabel di parti di sindicato TOPA, representando e miembronan cu ta trahando na KIA.
Trahadonan na KIA actualmente, no ta contento con e ‘plaatstingprocedure’ a bay. Na cabes di e comision di ‘plaatstingprocedure’ cu ta sinta na cabes ta e mesun director di KIA y no a cana n’e manera corecto.
Bernabela ta agrega cu tur mester a solicita, si nan tabata interesa den un vacatura nobo habri, no a haya e chens y yama pa bay den un entrevista. E otronan a haya carta di ‘oproeping’ of yamada despues cu e ‘plaatsingprocedure’ a caba.
Ey por mira cierto desaroyo cu a tuma luga. Sigur pa TOPA, no ta algo cu a palabra cu otro prome cu e comision di e ‘plaatsingprocedure’ a cuminsa traha. Ta lamentabel cu e miembronan di TOPA trahando na KIA ta bin dilanti na oficina di e sindicato pa denuncia tur esaki. No ta keda nada otro pa bay atende e asunto sumamente serio aki cu e minister di husticia pa mira con lo atende cu e problema aki.
Segun TOPA ta un problema sumamente grandi cu a tuma luga den KIA pa loke ta e ‘plaatsingprocedure’, cu ta algo inaceptabel pa e miembronan di sindicato TOPA.
Loke t’e parti di Inmigracion, ta un debacle cu tambe nan lo trece awemerdia na atencion di minister di husticia. Aki tambe tin un punto caminda cu ta bisa cu nan a bin constata retraso riba promocion fo’i tempo e minister di husticia anterior Arthur Dowers.
E empleadonan di Inmigracion a sigui nan ‘kaderopleiding’ y te dia di awe, 2021, no por haya nan promocion. Ta papiando cosnan fo’i 2013 te cu awe 2021.
Ta punto cu a trece dilanti durante di e reunion na ATIA, cual nan ta haya sumamente lamentabel hendenan di afo no sa kico e funcionarionan di gobierno ta pasando aden, pa loke ta nan derecho cu nan tin.
E momento a yega caminda cu tin cu restructura un departamento asina importante. Awo tin cu spera cu pa otro aña, ora cu publica e rapport, sindicato TOPA tambe por haya un copia. Unabes cu gobierno haya e rapport aki lo tin cu mira con lo implementa esaki.
