Siman pasa Stichting Algemene Bejaardenzorg Aruba (SABA) a pidi pa nan cay bou maneho di minister Dangui Oduber. E mandatario a informa cu di no por y a yama nan un lastigpakket. Cuido di Adulto Mayor ta un cartera riba su mes, pero SABA kier pa maneho resorta bou di e Minister di Salud Publico.
Remo Kock, director di SABA, a indica cu no ta gana voto cuido di adulto mayor. Ta algo dificil pa gana voto cu e grandinan, aunke minister a haya su post cu ne. E ta un post cu no tin hopi placa p’e. Aunke por mira e necesidad den pueblo. Si gobierno no dicidi pa cuminsa inverti den cuido di Adulto mayor, na dado momento no tin luga mas pa ora mester haya e cuido.
E director a indica cu specificamente nan no ta boga pa cay bou di Minister Dangui Oduber. Dado momento cu tin un eleccion nobo y ta formando e gabinete, Kock ta pidi pa SABA cay bek bou di Ministerio di Salud Publico. El a splica cu SABA no ta ouderenzorg. E enfermeria cu nan ta brinda, e dokternan specialisa, nan no ta bejaardenzorg, pero nan ta un verpleeghuis. Esey ta cay bou di Salud Publico.
TOCANTE SABA
A funda Stichting Algemene Bejaardenzorg Aruba (SABA) dia 22 di maart 1972. Su meta ta brinda alohamento, cuido y “verpleging” na adultonan mayor cu no por biba nan so mas den un cas. A intencion ta pa brinda nan un bon calidad di bida den e añanan cu ta keda nan di biba.
Nan tin tres localidad, na San Pedro de Verona na Playa, cu 109 cliente; Na Huize Maris Stella na Savaneta cu 98 cliente y na Centro di Cuido na San Nicolas cu capacidad pa 80 cliente pero tin solamente 48 cliente awor eyden.
Tur cliente eyden ta conta cu un plan di cuido individual. Nan ta conta cu dos specialista den “ouderengeneeskunde”. Pa yuda e grandinan move mas, SABA tin dos fisioterapista den servicio directo. Pa cuido psicosocial nan tin un psicologo den servicio.
Na tur ta conta cu 296 empleado den servicio directo di SABA, mientras cu tin tambe no menos di binti trahado “freelance” y un cantidad di boluntario.
