Den e di tres siman di luna di òktober tradishonalmente ta selebrá siman di Medioambente aki na Kòrsou. Pa e aña aki Selikor ta bai duna rekonosementu postumo na sra. Gladys van Dal, ku tabata un pilar den e lucha pa un medioambiente duradero.
E siman di medio ambiente pa aña 2018 ta kore di 15 pa 19 di òktober i Selikor a skohe pa un selebrashon ku un enfoke sereno pero úniko tantu internamente komo eksterno. Komo antesala pa e selebrashon interno ya for di luna di sèptèmber trahadónan di Selikor a haña un presentashon den kua Selikor su ròl den konservashon di nos medioambiente a bini bon kla dilanti. Den esaki a para ketu tambe na kada trahadó individual su aporte pa logra e meta komun. Djaluna 15 di òktober a inisiá e siman ku un ehersisio di pùzel.
Tur trahadó a risibí un pida di e pùzel i mester a bin pega esaki pa asina forma e totalidat. Na final di e siman trahadónan lo por apresiá e obra final. E ehersisio akí ta simbolisá e trahamentu huntu pa yega un di e metanan prinsipal di e kompania ku ta kuido di nos medioambiente. E ehersio ta ilustrá klaramente ku kada trahadó mester aportá ku su granito i ku sin aporte di un, e totalidat no ta kompletu.
Mas aleu den e siman di medioambiente Selikor lo bai duna rekonosementu na un baluarte riba e tereno akí. Netamente riba su fecha natal, 18 di òktober, lo bai otorgá e promé edishon di e Gladys van Dal-Mc Kenzie Award na organisashonnan ku ta tene bon kuenta ku perservashon di nos medioambiente den nan operashon. Sra. Gladys van Dal, ku tabata karga e apodo di madrina di Selikor, semper tabata hopi serka di maneho di e kompania aportando ku su vishon i alabes ku akshonnan konkreto. Banda di duna un aporte den diferente organisashon sosial i di medioambiente sra. Gladys tabata konosí pa su akshonnan di planta mata. Semper el a enfoká riba nos muchanan ya ku e tabata konvensí ku ta den e kurasonnan chikí mester ‘planta’ e simia di kuido di nos medioambiente.
Sra. Gladys tabata hopi kerí serka e famia di Selikor i ta un orguyo enorme pa e kompania por laga su nòmber keda resoná pa semper ku e Gladys van Dal-Mc Kenzie award. Durante di e anochi di entrega di e premio representante di e programa di Medioambiente di Nashonnan Uní pa e área di Caribe, sr. Vincent Sweeney, lo tene un diskurso. Selikor ta hasi un apelashon na komunidat pa den e siman di medioambiente para ketu na efektonan di nos akshonnan diario riba nos medioambiente.
