Diferente ocasion ABV a mustra su preocupacion. Diferente cos ta sosodiendo ultimo tempo na hospital, a causa cu ta motibo pa preocupa y nan ta buscando atencion di gobierno.
Gina Maduro, presidente di e sindicato, a splica cu e situacion di hospital ta andando, no for di awor aki caba.
Pa mas cu un aña caba, desde inicio di construccion di hospital, e pesadiya a cuminsa pa e trahadonan di hospital.
Desde comienso ora cu a dicidi ora cu ta bin cu un hospital nobo, a scoge pa un renobacion y expansion di hospital, unda cu e trahado ta mira cu e poblacion a crece, mester di espacio, mester di un otro hospital, unda cu tur ta contento cu lo bay haya un hospital nobo, expandi y renoba.
Pero na momento cu e construccion a cuminsa, e nachtmerrie a cuminsa. Tur dia tabata tin problema.
El a cuminsa cu stof, trilling. Esey tabata menos mal. Despues cada biaha e fasenan tabata avansa, y mas y mas e problemanan a avansa.
E toppunt di e problema tabata ultimo cu e boiler tabata wordo instala paden, unda cu continuamente tin holo di diesel, asina cu e boiler a start. Esey ta nifica cu cada biaha tin cu para actividadnan cu ta tuma luga den hospital. Tanto OK, ronthen, botica. Cada departamento a haya su turno y esey tabata frustrante, tanto pa pashent, cu cada biaha cu nan tin cu cancela nan cita, nan operacionnan, unda cu como hospital no por duna e servicio, manera mester ta, causando cu ta bin tempo di espera atrobe, extra gasto, overtime, etc.
Esey tin e trahadonan fada y harta. Ultimo tempo, continuamente tin diferente problema. Problemanan manera holo di diesel, cual ta un problema structural. Problema di lekkage y inundacion. Siman pasa e edificio MOB tabata na beurt.
Tambe e departamento di xray a wordo cera y a manda e empleadonan cas pa motibo di holor di diesel.
Awe mainta tempran ABV tabata riba pia pa mira kico ta e problema atrobe y awe tabata e sistema. ICT ta down.
Tur dia tin un problema cu ta stroba actividad y asina no por duna e servicio na hospital. Esey tin e trahadonan hopi disgusta, traha bao di un stress y fada.
Como sindicato y tambe trahadonan ta mira cu hospital no tin control mas riba esaki. Dunado di trabao ta man na cabes. No por garantisa e trahadonan bienestar, salubridad y siguridad. Awo tur trahado ta drenta den e edificio y no ta sinti nan sigur den nan trabao.
Tambe tin e recordnan di e trahadonan cu nan ziekmelding ta halto no cu nan ta malo, pero nan werkplek ta haci nan malo. E situacion di trabao no ta e manera sigur unda cu nan yega trabao, nan ta bira malo, unda cu tin cu bay medwork, pa nan meld.
Esey tin nan frustra cu continuamente mester haci esey, unda cu tin un procedura pa registra.
Ultimo biaha cu tabata tin lekkage di holor di diesel, ABV a pidi reunion urgente cu minister y sinta cu tur partido un biaha mas pasobra no por sigui cu e rumbo aki.
Tin 50% di bouw haci caba y falta 50% mas. Segun Maduro, e prome 50 a wak con el a bay y no a bay miho. Pesey ta boga pa e proximo 50% cu falta, bay na un miho manera y no por tuma ningun incidente mas.
Ta trahando na un hospital, pashentnan ta bin y nan kier sinti nan sigur den un luga unda nan ta bin busca nan salud.
No ta bay cu otro problema y esey ta pasando cu e trahadonan tambe cu ta coriendo cu tur e riesgonan. Esey ta problema y preocupacion cu tin como sindicato.
Practicamente tur siman ta na bestuurskantoor cerca minister pidiendo ayudo, wak con por yega na otro. Y partidonan con por yega na otro. Ta mira claramente un friccion entre hospital y SOGA. SOGA no tin control riba e Mericanonan.
E contratista ta haci y deshaci, manera cu ta un free for all tin eynan. E trahadonan ta carga e culpa. Cos no por sigui mas asina. Mester cambia e situacion di e bouw.
Mester mas man na obra
Tin un team in place, den cas, pa controla tur cos y asina, hunto duna OK. ta bay pa e siguiente paso. Segun Gina Maduro di ABV, tin un bouwcommissie na hospital, pero esey mester wordo reforsa.
Minister ta boga pa bin cu un di tres projectleider. No ta bezig ta trahando un cas, sino un hospital. Mester tin miho control ora cu cada fase wordo entrega y cualkier trabao wordo haci.
Eynan falta manpower. Di parti di SOGA tambe falta cojon, pa pone contratista na su luga tambe. Na final di dia ta pueblo ta bay paga miyones di e placa aki.
SOGA no por sigui laga e contratista haci y deshaci.
Kico ta sinti di minister
Loke cu a palabra cu minister ultimo, cu hospital mester entrega claim, cual a sosode siman pasa, di e casonan cu a sosode. Mirando cu ta extra gasto pa hospital. Mester paga companianan extra, paga overtime, etc.
Ta hopi placa di gasto extra di cada problema cu sosode eynan.
Tambe SOGA a haya opdracht tambe, y ta bezig ta traha rapport pa wak cuanto ta costa pa saca e boilernan. Bao di tur conseho negativo, toch e boiler a wordo poni den hospital. Esey ta e problema.
Ki ora cu start e boiler, tin problema cu holor di diesel. E boiler mester wordo saca afo. Mester wak cuanto e ta costa, ken ta bay paga pe y na unda lo ubik’e.
Di parti di ABV, nan tambe ta bezig cu activa nan abogado pa nan tambe cuminsa claim. Tin algun trahado cu ta malo di e situacion aki. Hospital ta claim y ABV ta claim hospital.
