Diahuebs, dia 25 di januari 2018 e grandioso careda di ‘Betico Memorial’ cu ta wordo organisa anualmente pa IBiSA lo tuma luga. Pre registracion a cuminsa online via www.beticoloop.com y tin “Early Bird Special” pa tur persona cu a registra online y pasa paga na IBiSA prome cu dia 5 di december 2017.
E “Early Birds” lo ricibi nan bib number cu nan prome nomber y lo por escohe nan number favorito entre 10-800 (locual ta disponibel). Participacion ta confirma despues e pago na IBiSA. E Dry–Fit Shirt y Bib Number lo por wordo busca for di dia 3 di januari 2018 na IBiSA. Ta tuma registracion te cu diamars, dia 23 di januari 2018 .Si nos yega na 800 participante confirma prome cu e fecha menciona nos lo post “Sold out” riba social media. Inscripicion pa participante local na e 6K Fun Walk & Run y 10K Run ta Afl. 25,- y pa participante internacional ta US$. 15,-. E careda ta sali exactamente pa 6’or di mainta for di riba caminda principal dilanti di Centro Deportivo Betico Croes na Sta. Cruz. Premiacion di e 6K y 10K Run ta segun categoria di edad y ta premia e coredonan masculino y femenino cu finalisa na 1er, 2do, 3er luga den nan categoria. Inscribi awe mes y cuminsa cu determinacion, trahando riba bo salud y condicion fisico.
