Djasabra 2 di dezèmber próksimo un total di 16 skol sekundario lo kompetí den e kompetensia Garbage is the New Music ku lo tuma lugá den Exibition Hall di WTC. Ta trata di un kompetensia musikal organisá pa Selikor NV i ku tin komo punto di salida produsí muzik for di instrumèntnan trahá di material resiklá.
Banda di ta responsabel pa kolektá, transportá i prosesá e shushi ku nos pais ta produsí, Selikor NV tin diferente programa pa konsientisá, eduká i formá nos komunidat riba importansia di un isla limpi. Ku e programanan akí Selikor NV ke trata na realisá un kambio di aktitut den e forma ku nos ta atendé ku shushi i ta hasi esaki entre otro dor di purba stimulá mas sentido patriótiko i amor pa pais. E grupo di enfoke
prinsipal di e programanan di konsientisashon ta nos hubentut. E kompetensia Garbage is the New Music ta un inspirashon ku a sali for di e pelíkula Landfill Harmonic. E dokumental akí ta relatá historia di un grupo di hóben ku, bou di guia di un direktor musikal, ta forma un banda i ta presentá tokando instrumènt trahá di material ku nan a piki riba lèntfel. E kompetensia musikal lo ta entre e diferente bandanan di skol ku a wòrdu formá dor di e 16 skolnan ku lo partisipá. Durante sigur 4 luna largu skolnan partisipante a risibí e guia nesesario di profeshonalnan den arte i músika komo parti di nan preparashon pa e kompetensia.
Naturalmente a para ketu tambe na e importansia di kuido di nos medioambiente i un isla limpi. Dosentenan di CAV i di músika di e diferente skolnan tabata komprometé i a karga
e proyekto akí di forma eksepshonal. Algun skol a bai asina leu di hasta inkorporá e proyekto akí komo parti di nan programa di aña. Selikor NV ta kontentu ku nos banko amigu MCB tambe a mira importansia di e proyekto akí, riba inisiativa propio, a djòin Selikor NV
den esaki. Ku e proyekto akí Selikor NV ke logra pa komunidat kuminsá mira shushi ku otro bista i realisá kiko tur nos por hasi ku un material ora ku no tin uzo mas p’e.
