Manera ta conoci, Departamento di Impuesto (DIMP) hunto cu Ministerio di Finansa ta encarga cu e reforma fiscal. Ta un tema cu e aña aki lo domina, den cual ta cambia henter nos sistema di impuesto, hacie mas facil, mas eficiente, pero cu na final lo duna gobierno su “fair share” den nos economia.
E añanan nos dilanti lo ta yena di reto, pa cual mas cu nunca lo conta riba cumplimento di comercio y ciudadanonan, pa ta bon contribuyente pa hunto nos recupera y sali mas duro di locual nos tabata tres aña pasa, prome cu e pandemia a yega na nos porta.
E economia di Aruba, danki na specialmente turismo, ta mustrando señalnan solido di recuperacion. Mester admiti cu Omicron no a yuda den e proceso pero si compara e aña prome, aña pasa definitivamente no tabata malo, aunke kisas e no tabata mesun bon pa tur sector den nos economia. Pa awo, ta momento pa cuminsa prepara pa un reforma fiscal grandi, pa hunto Aruba por logra metanan comun pa cu nos finansa publico.
Director di DIMP, mr. Luenne Gomez-Pieters, a conta cu pa e aña aki lo por spera hopi mas informacion relaciona cu e cambionan cu e reforma lo trece cu ne den nos sistema di belasting. Ta un cambio drastico di belasting directo pa indirecto, manera cu pa hopi aña ta papiando riba dje caba.
