Ricangel de Leça ta un di e refereenan di Aruba, cu tambe ta un referee di FIFA. Na diferente ocasion el a haya oportunidad pa dirigi weganan den exterior y un biaha mas a yam’e pa dirigi un wega di Scotiabank CONCACAF League 2020. E wega aki ta parti di e di cuater (4) edicion di un competencia di club di futbol organisa pa CONCACAF. E wega cu De Leça a dirigi tawata entre Arcahaie di Haiti y Waterhouse di Jamaica.
AVB ta orguyoso di mira con Aruba ta resalta den mundo di futbol internacional. Locual ta hacie aun mas interesante ta e hecho cu e “referee Assessor” di CONCACAF a duna Ricangel de Leça un tremendo review riba e forma con e la dirigi e wega.
Arubaanse Voetbal Bond (AVB) ta orguyoso di scucha feedbacknan positivo. Nan tin como meta pa sigui engrandece futbol di Aruba, p’esey a desaroya plannan pa yuda organisacionnan sigui crece y p’esaki AVB ta contento di mira con cosnan ta bayendo.
No solamente ta yuda clubnan, pero tambe ta yuda door di bin cu trainingnan pa referee por sigui crece. Pabien de Leça cu e bon trabou!
