Ta parce cu Pfizer lo ta esun prome pa subi mercado cu un vacuna contra corona. Na final di e luna aki lo haci un peticion pa esaki, e compania farmaceutico Mericano a duna di conoce.
E mas ultimo resultado di nan investigacionnan, cu a publica awe ta mustra cu e vacuna ta dunando hopi bon resultado. Expertonan a reacciona cu hopi entusiasmo, pero tin algo toch pendiente.
Ta trata di e prome resultadonan di fase 3 di e investigacion, e ultimo fase prome cu un vacuna bini riba mercado. Den e fase aki a test mas cu 43.000 persona. Di e prome analisis haci ta resulta cu 94 persona cu a participa den e test a haya corona. Un gran parti di nan tabata di e grupo cu a haya placebo, segun Pfizer a informa, cu a base di cifranan ta conclui cu e vacuna ta pa un 90% efectivo.
E porcentahe aki ta hopi mas halto cu ta exigi pa un vacuna por subi mercado . Pa haci un comparacion, mayoria di vacunanan tin un grado di efectividad rond di 80%; den caso di corona, autoridadnan di salud ta contento cu e efectividad di mas cu 50%.
Pa aworaki, durante e estudio di e vacuna no a surgi problema grandi riba e parti di efectonan secundario , segun e compania Mericano.
E director di e compania Albert Bourla a papia di “un avance grandi”. “Cu e noticia aki nos a dal un stap grandi pa yega mas cerca di un vacuna cu lo pone un fin na e crisis mundial di salud.”
Profesor Anke Huckriede, vaccinologie na Rijksuniversiteit Groningen, a cataloga e resultadonan di Pfizer “algo miho di loke nos a spera”. “Esaki ta bon noticia, sigur a termino corto. Tur cos ta mustra cue vacuna ta brinda un bon proteccion pa un bon tempo contra coronavirus.”
Pero e pregunta cu e tin ta: Te con leu e vacuna ta funciona, si ta papia di termino largo. Esey no por mira a base di e resultadonan awo. E no ta kere cu e efectividad di 90% lo keda asina pasobra a largo termino e lo baha un poco.
Otro expertonan tambe a comenta cu e efectividad di 90% ta hopi halto y ta un noticia hopi bon. Pfizer a haci uzo di e tecnologia mRNA, y nunca antes a base di e tecnica aki a pone un vacuna riba mercado.”
E gran bentaha di mRNA: e ta sigur – pasobra no ta haci uzo di virus existente – y facilmente por produci esaki. P’esey ta spera cu e vacuna aki por subi mercado na gran escala y a termino corto, unabes cu haya e permiso necesario.
Pfizer, ta traha hunto cu e farmaceutico Aleman BioNTech, y ta spera cu den e proximo dos simanan tin resultado adicional. Nan lo bay haci un peticion na FDA pa subi mercado. E entidad aki ta exigi pa e vacuna tin un efectividad minimo di 50%: a logra esaki y miho.
Nederland
Hulanda a ordo, hunto cu estadonan miembro di Union Europeo, 200 miyon dosis di e vacuna. N Europa e vacuna ta wordo aproba door di EMA, het Europees Geneesmiddelen Agentschap. Nan ta revisando esaki caba.
Como cu Hulanda tin derecho riba 3.89% di e vacuna cumpra, por spera cu nan lo haya 8 miyon dosis. Como cu mester di dos hangua, cu ta nifica cu un poco mas di 4 miyon Hulandes lo haya e vacuna.
Produccion
No t’asina cu tin tur e vacunanan cla ora cu haya permiso pa subi mercado. Pfizer ta produci e vacuna hunto cu Merca, Belgica, y Alemania. E aña’ki lo tin 100 miyon dosis disponibel. Na 2021 lo tin 1.3 biyon vacuna produci.
No ta conoci cuanto Europese Commissie ta paga pa unvacuna. Na Merca Pfizer y BioNTech a cera un deal di 1,95 biyon dollar pa 100 miyon dosis. Esaki ta 19,50 dollar pa hangua, 39 dollar pa e dosnan necesario.
E companianan aki ta produci e vacuna sin subsidio, pues cu nan mesun inversion.
E vacuna mester keda den un temperatura hopi friu (-80 grado minimo) cu ta haci su transporte un poco compleho.
