Servicio Informativo di Gobierno (Bureau Voorlichting – BUVO) kier recorda pueblo di Aruba y esnan cu ta biba den exterior cu riba anochi di eleccion tin un transmision special di e resultado di eleccion ariba homepage di e websitenan oficial di gobierno di Aruba cu ta www.overheid.aw, www.gobierno.aw y www.government.aw.
Riba 22 di september proximo lo tin eleccion na Aruba pa eligi miembronan di Parlamento. Despues cu tur urna electoral cera, lo pone ariba e homepage di e websitenan ariba menciona tur resultado cu drenta for di Conseho Supremo Electoral. Manera cu un resultado di un urna ta conoci, esaki lo aparece ariba e homepage di e tres websitenan. E resultadonan preliminar pa urna y pa districto, mesora lo ta disponibel hunto cu estadisticonan y grafieknan. Tambe lo tin comparacion cu resultado anterior, esta di eleccion di 2013. E pronostico di asiento pa cada partido tambe lo keda calcula mesora. Dia 22 di september den oranan di anochi, tur esnan interesa, specialmente esnan cu ta biba afor por sigui e resultado di eleccion via e websitenan menciona.
