Maske cu Aruba ta keda liber di e malesa di Monkeypox, caso di e malesa aki ta sigui keda raporta na World Health Organisation (WHO) for di algun pais no endemico, cu ta pais unda anteriormente no tabata conoxe caso di Monkeypox.
P’esey ta bon pa nos keda educa nos mes y sa kico e sintomanan di Monkeypox ta. Por reconoce un posibel infeccion di e malesa aki, pa su similaridad cu smallpox ordinario, conoci bou nos poblacion como bruela.
Despues cu un persona wordo infecta cu Monkeypox, tin un tempo di incubacion cu ta entre 1 pa 2 siman, aproximadamente. E persona cu a infecta por cuminsa presenta sintoma di griep manera keintura, dolor di cabes y di curpa, cansancio y klier hincha. Entre 1 cu 3 dia despues di e keintura, ta desaroya e tipico rash cu ta e spotnan plat y cora, cu despues ta bira blaar cu likido cu ta yena cu pus. E rash por aparece na cualkier parti rib’e curpa, pero principalmente na e cara y despues ta expande na otro parti di curpa, incluyendo plant’i man y di pia; y tambe rond di area genital of anal.
E blaarnan por haci dolor y grawata hopi. Algun persona por tin un of dos blaar mientras otro por tin hopi. E blaar ta keda infeccioso te na momento cu e haya casca, esaki cay y un cuero nobo nace. Esaki por dura algun siman pa cual motibo e persona infecta mester keda isola pa proteha otro.
Sintomanan di Monkeypox ta:
Keintura
Dolor di cabes
Cansancio
Kliernan hincha
Rash
Blaar cu pus
Algun hende lo experencia tur sintoma di Monkeypox mientras otro lo experencia solamente algun.
E malesa aki ta hopi contagioso. P’esey pa preveni di keda contagia ta recomenda pa evita di brasa, sunchi, caricia, mishi cu blar riba e curpa di un persona infecta of tene relacion sexual.
Si bo presenta esakinan, tuma contacto mesora cu bo dokter di cas!
#mintsp #negativo #0caso
