Aleluya , Dios ta fiel y misericordioso, y Dios den tur forma ta avisa nos , pa evita rebeldia contra su Palabra y pa nos tin temor di Dios y biba segun boluntad di Dios.
Den Isaias capitulo 5 vers 20 Dios ta bisa: Ay di esnan cu ta yama loke ta malo bon, y loke ta bon malo, loke ta scuridad lus, y loke ta lus scuridad. Loke ta marga dushi, y loke ta dushi marga.
Proverbionan capitulo 21 vers 30 ta bisa: No tin sabiduria, ni comprondemento, ni conseho contra Señor.
Mateo capitulo 12 vers 30 ta para scirbi: Hesus ta bisa Esun cu no ta cu Mi, ta contra Mi, y esun cu no ta recohe hunto cu Mi ta plama.
Efesionan capitulo 6 vers 1-4 ta bisa : Yuinan obedece boso mayornan den Señor, pasobra esaki ta husto. Honra bo tata y bo mama ( cu ta e prome mandamento cu un promesa) pa bay bo bon y pa bo tin bida largo riba tera.
Boso tatanan, no provoca boso yiunan na rabia, ma lanta nan den e disiplina y instruccion di Señor.
Salmo 127 vers 1-2 ta bisa; Si Señor no a traha e cas, ta envano esnan cu ta trahe, ta traha cansa curpa, si Señor no warda e stad, ta envano e guardia ta keda lanta.
Lo no sirbibo di nada, pa lanta tempran, pa keda lanta te laat, pa come pan di amargura, pasobra e ta provee pa su stima den su soño.
Den tur forma Dios kier demostra nos pa no sigi purba riba nos mes, no haci nada for di su boluntad, cu nos mester consulta cu Dios den tur cos, y cu no tin ningun hende sabi, y nos tur mester di Dios.
Tin hende cu ta bao di e engaño di diabel, y door di esey ta forma un blokeo mental y spiritual, pa di tur manera evita di scucha y aplica y palabra di Dios den nan bida, pasobra e scuridad tin dominio riba nan.
Dios ta yama mayornan pa splika nan yuinan, cu no tin nada scondi pa Dios, cu dilanti di Dios ningun hende tin bida priva,y cu tur locual hende sembra, nan lo cosecha, pasobra ningun hende por haci bofon di Dios, Dios no ta permiti esey.
Satanas cual ta e tata di mentira, ta pone tur clase di mentira den mente di hende, pa nan rechasa e Berdad, y rebeldia contra Dios,ta pa e keda mantene dominio riba nan bida , nan hogar, y famia, pasobra mientras cu mentira, ta domina , hende ta aleha for di Dios.
Den tur historia , for di comienso di mundo te cu awe, ningun hende cu a lanta contra Dios a triunfa, pasobra esey ta imposibel, no ta importa e grandura di e organisacion of reino, of e por ta un principado of potestad( Efesios 6:12) dilanti di Dios tu cos ta caba na nada.
Nos mester bati alarma y no sinta boca sera, pasobra rebeldia contra Dios ta purba domina y infiltra tur caminda, ta parce manera inmoralidad kier tuma control.( 1Thesalonisenses 4:7 y 1 Cor 6:18).
Un mayor no tey pa e ta compinche di su yiu den maldad, pero pa guia e yiu den caminda di Dios, pasobra den tur caso e mayor ta responsabel pa esey.
Den ningun caso rebeldia lo no prevalese dilanti di Dios.
Pesey nos mester laga Cristo goberna nos bida y nos hogar.
Sinceramente , Pastor Marcel Balootje
