Den e ultimo siman cu a pasa por a tuma nota cu gobierno di Aruba a realisa e pago di bashi premie completo pa e trahadonan publico. Tur hende por a tuma nota di esaki debi cu Minister di Finanzas Xiomara Maduro a publica esaki riba su pagina di Facebook pa un y tur mira. Mas cu claro esaki a causa poco controversia debi cu ta hopi hende no a compronde pakico ta publica e tipo di informacion aki y a hasta inclui e suma cu e trahadonan a ricibi.
Awe mainta den un conferencia di prensa e minister a duna su opinion riba e reaccionnan cu el a ricibi pa esaki. Asina Maduro a splica cu el a simplemente indica cu el a paga e suma aki n’e trahadonan. Motibo pa esaki ta cu segun su persona, hopi biaha hende kier transparencia specialmente den e area di finanzas publico y hopi biaha hende kier sa di e cifranan y ta p’esey ta presenta esakinan. Pues cu esaki den mente el a opta pa no publica solamente e hecho cu a paga e bashi premie 100%, pero tambe e suma di esaki.
Sinembargo, el a tuma nota tambe di tur critica, entre otro, cu no ta etico cu e minister di finanzas ta publica cuanto a paga na bashi premie siendo cu segun Maduro esaki ta poni den un documento publico. E ta compronde con esaki por a cay den mal tera si, pero ta relaciona e reaccionnan aki cu e situacion di e sindicatonan, kende ta bisa cu gobierno no ta transparente, pero awo cu ta ful transparente, tampoco ta bon pa algun hende. Den tur esaki tambe, el a bisa cu el a papia cu varios persona y algun di nan a bisa cu nan pareha no ta na altura cu nan ta cobra e bashi premie aki y cu ta esaki ta locual a trece tur e rabiamento.
Pa un relato mas amplio lesa edicion di TREMPAN mañan.
