Quota International di Aruba hopi lihe a anuncia resultado di e testnan cu a haci e luna aki den cuadro di nan campaña pa proteccion di oido. E resultado a laga e propio directiva spanta. Alarmante, nan a bisa e resultadonan aki ta, despues di a haci un analisis di e cifranan ricibi.
Den un conferencia di prensa e presidente di Quota International Aruba Ivy Simon-Hernandez a expresa su mes riba e resultadonan.
A haci e testnan aki den cuadro di e Siman di Conscientisacion di Cuido di Oido. A realisa e testnan na cuatro diferente punto y ta trata di e testnan completamente gratis. Tur aña den luna di september ta haci esaki cu cooperacion di diferente instancia. “Quota ta sumamente satisfecho, y na mesun momento mester bisa cu nos ta hopi preocupa. Casi 200 hende tabatin e oportunidad pa haci e testnan y e resultadonan ta alarmante”, Simon-Hernandez a bisa.
Di e total di e personanan cu a haci test, 50% di nan tin un of otro problema cu nan oido, “Esaki ta mustra cu nos tin un problema grandi di oido na Aruba.
Nan a bin ta haci e testnan aki pa 38 aña y nunca a haya e tipo di resultadonan aki cu a pone nan pensa di biaha kico mester bay haci. E resultado alarmante aki a haya full rond Aruba, no solamente den un area.
Quota ta satisfecho y mester traha riba e aspecto di precaucion pa e generacion di futuro. Mas pasobra ta cerca di temporada di Carnaval 70. No mester lubida, e presidente di Quota a bisa, exposicion na zonido demasiado, cerca y pa un periodo largo, ta causa daño na e oido. “Quota tin un trabou pa haci, sigui yuda na preveni e tipo di problemanan aki.
Pa mas lesa TREMPAN.COM.
