Mientras algun ta festeha Dia di San Valentin y otronan preparando pa Jouvert Morning, ta sosode un accidente basta fuerte riba Green Corredor den cercania di Tele Aruba.
Na sitio a bin compronde cu tin tres auto envolvi. Dos di e vehiculonan tabata pustando riba Green Corridor mientras uno tabata transitando sin percata cu e vehiculonan tabata bin cu velocidad hopi halto su tras. Ta supone cu nan no a calcula bon e auto nan dilanti y e impacto tabata inevitabel. Un di e autonan, e Skyline Blanco a bay dal den e auto Honda color blauw su dilanti cu a bay draai algun biaha prome cu e la para. Pustamento tabata entre un Skyline blanco y un otro desconoci.
Por a tuma nota tambe cu e vehiculo a bay dal den e vangrail despues di a lastra un brake basta largo. Segun testigonan e 3er vehiculo cu tabata pustando lo a sigui core mientras e dos autonan accidenta a keda para riba caminda. E distancia di caminda cu a impacta y caminda cu nan a para ta di algun palo di luz di leu.
Polis a cera e area y e cabayero di e vehiculo cu a keda na sitio tabata sinti dolor na lomba. A trat’e na sitio. Daño material tabata uno considerabel.