Continuando cu e cobertura cu TREMPAN ta dunando na e proximo salida den libertad di e asesino Eugene Lampe, ta enfoca e biaha aki riba su condicion mental. E ta un pashent di schizofrenia y paranoia, manera cu a keda indica dia cu e caso a bin dilanti den corte. Pa e motibo ey a entrevista director di Respaldo, psikiatra dr. Hendrikus van Gaalen, pa e splica un poco tocante kico ta schizofrenia, con ta atende awendia cu un situacion manera esun cu Lampe ta presenta pa sociedad y kico por spera.
Dr. van Gaalen a splica schizofrenia di e siguiente forma: Nos tur por bira bruha un poco den bida, sinembargo si bo ta scucha of bo ta mira cos cu no ta cuadra cu realidad y si esey ta bay hopi leu, of pa hopi tempo, e ora ey bo ta papia di un psicosis y un condicion of problema mental. Bo por tin psicosis, door di un accidente (trauma fisico), door di consumo di droga of door di un malesa caminda tin keintura halto. Si e psicosis ey ta persisti pa mas cu mey aña, e ora ey ta papia di schizofrenia.
E incidencia di e malesa mental aki na Aruba ta relativamente igual na esun rond mundo cu ta varia entre 0.3% y 1% di e poblacion total. Respaldo tin un registro cu actualmente ta den proceso di digitalisacion. Loke si el a confirma ta cu na Aruba tin por lo menos 500 caso diagnostica di schizofrenia. E registro ta duna un miho bista riba e clasificacion di diferente tipo di schizofrenia y tambe di e tratamento necesario.
Un schizofrenico cu a comete un crimen no necesariamente a haci esaki door di su malesa. E por ta djis un persona cu schizofrenia cu conscientemente a horta un bril na un tienda; depende di con pisa su schizofrenia ta. Tambe e por a comete un crimen hopi mas grave, manera mata henter su famia, pasobra e schizofrenia a lag’e tende un stem den su cabes cu a bis’e kico pa haci; mas ainda si e ta sintie den un situacion menasante. Pa e relato completo, lesa e edicion di TREMPAN di awe.
