Siman pasa diahuebs a tuma luga un tremendo training di Human Resources pa miembronan di bestuur di e Centronan di Bario cu ta forma parti di e proyecto di Bario Unico di Cede Aruba. Facilitado di e training tabata Christel Croes.
Hopi topico a ser trata, por menciona entre otro e trayecto di atrae y selecciona talento te cu e parti ora cu ta retira un empleado, con ta implementa cambio, e importancia di bon liderazgo, di planning di trabou y di documenta, con pa yuda y guia un empleado den su trayectorio di trabou y hopi mas.
Christel Croes ta un Innovative and Strategic Training Manager cu mas di 20 aña di experiencia den diseña, desaroya y implementa programanan di training. Un experto den identifica necesidadnan y crea training cu ta yuda mehora prestacion y productividad di empleadonan.
Gradicimento ta bay na e representantenan di Centronan di Bario Brazil, Piedra Plat, Dakota, Ayo, Noord, Santa Cruz y Lago Heights pa nan participacion, na Universidad di Aruba pa su continuo colaboracion di pone un localidad disponibel pa training y na Christel Croes cu, mirando e necesidad y como parti di duna bek na comunidad, a duna e training di curason.
Di parti di Bario Unico – CEDE ARUBA lo sigui brinda oportunidadnan di training na miembronan di bestuur di e Centronan di BARiO cu ta forma parti di BARiO UNICO, pa di e forma aki sigui reenforsa nan pa nan por sigui cu nan trabou cu nan ta haci a base boluntario pa nan bario y pa comunidad di Aruba en general.
CEDE ARUBA ta curasha comunidad di Aruba pa ta parti di e movemento di Community Building. Check cu e centro den bo bario con bo por yuda, participa na nan actividadnan, bira boluntario. Community building ta un responsabilidad di nos tur. Ban uni forsa pa yuda e barionan di Aruba. Pa mas informacion encuanto e proyecto aki por tuma contact via email [email protected] of por yama CEDE ARUBA-BARiO UNICO na number di telefon 582 7666.
