Awe diadomingo, e ultimo dia di luna di januari, a lanta e prome vuelo repatriamento for di Aruba pa Venezuela. Por a nota cu tabatin basta hende, no solamente esnan cu tabata deteni pa deportacion y cu a yega cu Van di Warda Nos Costa, pero tambe esnan cu riba nan mes a dicidi bay nan pais.
Un di e ciudadanonan Venezolano cu a topa cu ne na aeropuerto, cu maleta cla pa bandona Aruba, ta Iris Villa Mendez. Segun el a splica cu el a bini Aruba di vacacion, pero ya aki su paspoort a vence cu a caus’e algun problema. Finalmente el a logra haya aprobacion di autoridadnan concerni pa e por bandona e pais. E ta consciente cu e trabou na Venezuela no ta facil, pero e lo traha manera semper el a haci.
El a biaha cu mas hende pa Aruba, y nan tur a keda pega cu e yegada di e pandemia tambe. Finalmente el a logra acumula e placa pa e por a paga su pasashi y bolbe Maracaibo, Venezuela.
Tin ciudadano Venezolano cu ta biba na Aruba, manera un cabayero (Saturno Garcia) cu tin 30 aña bibando riba e isla, y a dicidi pa probecha di e vuelo humano pa bay Venezuela pa regla algun asunto y despues bolbe Aruba via di otro ruta.
Aña pasa DIMAS y demas stakeholder a organisa cinco vuelo repatriamento for di Aruba pa Venezuela, cuminsando den luna di september. Mas o menos mil persona a logra bandona e isla di e forma aki. Tabata trata di tanto personanan deporta, esnan cu a keda pega aki of esnan cu a keda ilegal.
