Arubaanse Bond voor Motorsports ta hopi contento cu e desaroyo na Palo Marga. Esaki ta loke e presidente Richard Every a duna di conoce despues cu diadomingo nan a haci nan prome test pa careda di street legal.
E ta admiti di a topa cu algun contratiempo pero a traha riba eseynan. Tabata presente personal di DVG pa yuda cu e reglanan di protocol. Algun di e reglanan mester a adapta, y e testnan por a sigui. E presencia di DVG y polis, Every a splica, a yuda pa sigura cu nan tin tur cos segun e protocolnan di DVG. “Mi ta gradici e departamentonan pa nan ayudo. Nan a yuda nos cumpli cu e reglanan mas miho,” el a bisa.
A papia cu tur participante riba cual ta e reglanan durante competencianan y a haya cooperacion di e coredonan hunto cu nan team. Nan ta spera cu e aña’ki por tin careda. Nan ta compronde cu lo no duna permiso pa evenementonan, pero si nan por tene sesionnan di training e lo mantene e hendenan aki activo.
El a sigura cu nan lo mantene nan mes na tur regla pa mantene e casonan di contagio abou y ta haci apelacion na henter Aruba pa haci mesun cos.
