Districto di San Nicolas pa motibonan desconoci, ta confronta cu diferente caso di candela recientemente. Tabatin varios candela ultimo aki na Weg Rooi Hundo y awo ta den Tulpenstraat tabatin un candela.
Tabata dialuna rond di 12:50 di marduga cu un habitante di Tulpenstraat 66 na San Nicolas a bati alarma p’un candela basta grandi den cura di cas cu por poco a kima full e cas.
Tanto brandweer como polis a presenta na dicho adres y a combati e candela cu tabata di sushi y cual ta kima hopi lihe.
Hasta doño di cas a sali pafo p’asina yuda pag’e candela, cu ta menasa su cas den oranan di marduga, c’un hos di muha mata. Na final bomberonan a logra domina e candela y preveni un desaster cu aparentemente ta intencionalmente cendi.
Ta momento pa autoridadnan cuminsa cu un investigacion. Combatimento di candelanan ta trece gastonan cu ne y si un persona ta haci esaki intencionalmente, e lo mester carga cu e consecuencianan pasobra ademas cu e ta un delito, e lo tin cu paga e gastonan.
