Prome Minister Evelyn Wever Croes a splica den conferencia di Gobierno cu Aruba a scoge pa e strategia di test den forma agresivo. E cifranan cu a yega na mas cu 16.500 test. Pero tambe a mustra su preocupacion pa e cantidad di casonan cu sigur lo trece cu ne cu na dado momento morto lo cay.
E cantidad di test aki ta mustra cu no por compara Aruba sin mas cu e situacion na otro paisnan. E strategia ta hopi diferente. Corsou tin un poblacion hopi mas grandi cu Aruba pero tin unicamente 2 mil y pico test haci mientras cu Boneiro tin rond di 500 test realisa. No ta haci e test pa loco pero si den forma agresivo, e mandatario a splica den e ultimo conferencia di Gobierno. “No por simplemente compara Aruba cu otro paisnan. Nos kier busca e virus y detecta esaki mas tempran.”
Di otro banda, no por nenga, el a bisa, cu e cifranan ta hopi halto. Aruba a conoce su piek riba diabierna, 7 di augustus ora cu a haya 133 caso positivo. Despues a yega na un averahe di 76, pero no ta bahando suficiente manera Gobierno lo kier mira. Mester cuminsa mira resultado di e decisionnan cu a tuma dos siman pasa.
Pa baha e cifranan mas, Gobierno a dicidi di tuma algun medida, cuminsando pa pospone apertura di scolnan pa alumnonan pa dos siman mas, mientras ta sigui cu e evaluacion. Pa loke ta e bida nocturno, e riesgo ta grandi, y ta mira cu esnan cu tin cierto permiso ta purba di ta creativo y trata di cambia reglanan. Pa e motibonan aki ta bay haci mas adaptacion den e regla y medidanan pa e sector aki. Pero no ta e doñonan so mester ta responsabel. E mandatario ta haya cu ciudadanonan mester percura cu cualkier establecimento unda cu e bay ta cumpli cu reglanan. Hala atencion of saca un potret y manda esaki na [email protected]
“Loke cu a pasa na Aruba e ultimo dos simanan ta algo cu no por bolbe ripiti. Mi kier pidi boso pa mantene boso mes na regla. Boso kier pa morto cay pa tuma e situacion na serio? Of ora morto cay den bo cas. Awo tin 16 hende den hospital, di cual 3 ta den Cuido Intensivo. Morto ta bay cay. Abo b=por dicidi awo si bo kier morto cay den bo cas of no. Si bo no tin sintoma no sali riba caya bay buske,” e mandatario a bisa.
