Siman pasa a anuncia apertura di scol cu ta dia 20 di augustus, pero awo esaki a cambia y ta bira dia 3 di september. Na comienso esey tabata un fecha stipula, pero e comision a ripara cu tanten e casonan ta aumenta y no baha manera a anuncia.
Ora cu tur cos tabata bou control, segun Director di Departamento Asuntonan Social, Glenda Hernandez, nan a propone p’e fecha di 20 augustus. E casonan ta sigui aumenta y awo Aruba ta hinca den un situacion serio. A bisa esey anterior, pero hopi hende no ta compronde e seriedad di e situacion cu ta den dje.
E momento ey a pensa di ta bon p’e muchanan tin contacto social y no ta cera den cas pa tempo largo. El a sigui splica cu asina e muchanan bin scol, tin un wowo riba nan pa problema social na cas di cual aworaki ta basta halto. Despues di a evalua e situacion y a constata di tin un crisis, mester bay haci algo si no stop e subida y na cierto momento por confronta situacion den hospital unda lo tin di scoge kende lo biba of fayece. Hernandez a expresa cu nan no kier yega na e situacion ey.
Nan a papia cu directiva di tur scol, e crisis team a papia di no kier yega na e punto ey. E escogencia lo ta den e famia, unda lo tin di scoge sea ta e welo / wela of un hende mas hoben. Asina por gara e seriedad di e cos aki. A cambia e fecha pa 3 di september y lo sigui monitoria e desaroyo. Te ainda hospital por handle e situacion medicamente, pero si no stop e awo, e lo bay for di man. E lo cay bou di e grupo secundario, hendenan di edad, esnan di riesgo halto, y Aruba ta consisti di un grupo grandi di esakinan.
Ta cera tur scol pa dos siman y mira ki efecto esey tin riba e subida di casonan di COVID. E fecha aki ta conta pa tur scol basico, kleuter y secundario. Nan ta spera cu e medida aki por trece un reduccion di e casonan. Mayornan tin cu tene e mucha- y hobennan na cas. P’e motibo aki nan kier duna aporte y stipula un maneho pa frena esaki.
Pa cera e scol dos siman, esaki tin consecuencia pa school onderzoeken, examennan di october, y tur esey lo haya e debido atencion. E comision lo papia cu SEPPA, SIMAR y gremionan di scol, tambe cu mayornan pa mira e puntonan di atencion cu mester trata. Lo bin un proposicion con pa resolve school examen di october. Tin algun idea, pero lo trata esakinan. Pa loke ta creche y Tra’i merdia, a propone pa mantene 50% habri manera e ta aworaki. Si esaki cera, lo tranca e mercado laboral. Segun Hernandez, nan kier dal e cera, pero no por pa motibo cu hopi hende ta traha y a opta pa tene 50% habri.
