Prome Minister Evelyn Wever Croes a manda un carta pa Prome Minister Mark Rutte di Hulanda relaciona cu e condicionnan pa e ayudo di likides (3er tranche), den cual carta e mandatario ta expresa su frustracion pa e forma con Hulanda ta atende cu Aruba den e asunto aki. Un Aruba cu te awor a cumpli cu tur condicion. Awo den 4 dia kier pa Aruba dicidi, sin tempo pa consulta ni cu Parlamento, pa acepta e condicionnan aki cu ta hiba Aruba 34 aña atras den tempo. E mandatario a compara e situacion di Aruba manera esun di e Mericano George Floyd, kende tabata gritando “I can’t breathe” mientras cu un Polis tabata primi su rudia riba su garganta te ora cu e no tabata reacciona mas.
Den e carta, uno basta fuerte, e mandatario a expresa tur su malcontento pa e forma con Hulanda ta atende cu Aruba, con den forma repentino ta bini cu condicion adicional riba cual mester tuma un decision den 4 dia pa por haya e prestamo for di Hulanda. Ni un regalo pero un prestamo. Pa entrega autonomia di Aruba, ta duna solamente 4 dia, pa bay na un situacion cu ta hiba Aruba 34 aña atras den tempo y sin haya nada a cambio. E placa cu mester haya ta un prestamo cu Aruba, manera semper, mester paga bek y no ta haya e exoneracion di un debe, manera cu Corsou si a haya na 10 di october 2010 ora cu a cambia nan status den Reino Hulandes.
Loading…
Reload document 
Open in new tab “E forma di actua aki ta un violacion di norma- y balornan democratico …Ta coba den e democracia y autonomia di e paisnan Caribense door di creacion di un entidad nobo cual sin ningun control democratico ta bay guia finanza y e maneho di nan ….”
Tambe ta informa Rutte cu e condicion extra ta di mas, principalmente pa loke ta e caso di Aruba ya cu semper a cumpli cu e condicionnan pa e prestamonan. Ta tuma Hulanda na malo cu ta bini cu e condicion aki pasobra tur hende sa cu Covid-19 tabata funesto pa e islanan aki y a scoge pa pone un prijs na e solidaridad di Hulanda. Un ayudo cu Hulanda ta duna y cu mester paga bek, cu ta en pugna cu articulo 36 di Statuut. Pues nan ta bisa cu no tin ningun motibo valido pa bini cu un Rijkswet. Aruba ta conoci internacionalmente di semper a cumpli cu su pagonan.
Hamas, e ta bisa den e carta, Aruba a spera di wordo imponi na e condicionnan cu Hulanda a bini cu ne, sin consulta, sin duna nan chens pa reacciona, sin conseho di CAft.
Na final di e carta e mandatario ta bisa cu “Hulanda semper a exigi di e islanan un actuacion di adulto, a wanta su mes semper na principionan di Bon Gobernacion, cumpli cu palabracionnan y carga su mesun responsabilidad. Ta parce manera cu Aruba ta e version di e Mericano George Floyd (y nos mesun Mitch Henriquez). Mark, asina nos no por hala rosea.”
