Prome Minister Evelyn Wever Croes den e conferencia di prensa di Gobierno dialuna mainta a papia riba diferente topico, entre otro aña escolar nobo y e cantidad di docentenan cu ta cumpliendo añanan di servicio, y e tema di COVID, cu maneho di esaki ta bayendo bon. Pero tambe a papia di e combersacionnan cu Hulanda.
Den caso COVID, a bisa cu e strategia tuma ta dunando resultado, ta dominando e situacion despues di apertura di frontera. Pero tambe a papia di e negociacion cu Hulanda, specialmente e condicionnan nobo poni pa Aruba haya e di tres tranche di prestamo. “Te ainda nos ta negociando,” e mandatario a bisa.
Mientrastanto a cuminsa locamente cu un proceso di consulta cu gremionan. Basa riba inputnan, a sigui combersa cu Hulanda. Punto principal ta cu Aruba no por perde su autonomia den e proceso pa haya prestamo. Ta tratando di yega na acuerdo cu Hulanda, respetando estado di derecho, pa Aruba por scoge su Gobernantenan y respeta e rol di Parlamento na nos pais.
Pa loke ta e lista di accion cu Hulanda a pone como condicion, ta tratando di mira con por pone den contexto di Aruba. Un di nan ta cu den tres aña kier pa esaki bira 67 aña den tres aña di tempo. Pero Aruba kier haci investigacion prome. E benta di compania di shares di companianan estatal, a mustra cu esaki mester bay via di Parlamento.
Pa loke ta e instancia cu Hulanda kier bini cu ne, ta algo cu Aruba ta compronde mirando e suma grandi di placa cu ta bay presta Aruba. Pero kier mira pa saca mas beneficio di e punto aki.
Diaranson 5 di augustus, tin e siguiente update cu gremionan. A enfatisa cu apesar cu tin reces, el a sigui den combersacion cu Minister Knops practicamente tur dia. Fin di juli a logra cera placa pa paga Loonsubsidie, FASE apesar cu no a haya placa ainda di Hulanda. A logra cortando mas den gasto y posponiendo algun pago. Pero mucho mas no por keda warda, mester yega mas lihe posibel na un acuerdo y ta spera cu por memey di luna por yega na un acuerdo, pasobra sin ayudo no por sali di e problemanan.
