Awe mainta, prome cu para di mucha na Playa, a tuma luga e traspaso di mando di Gobierno di Aruba pa Prins y Pancho Infantil, Hubenil y Grandi di Aruba su Carnaval 64. Esaki a sosode despues di nan yegada bao di ritmo di Asambeho, den compania di reinanan Infantil, Hubenil, Grandi y sra. Carnaval. Durante di e ceremonia di entrega di e yabi simbolico, Prins Bon y Pancho Laaf, a haci nan proclamacion na Pueblo di Aruba, pa loke ta e temporada dushi aki di Carnaval, apesar cu su fin ya caba ta den porta. Sigur un decreto a wordo entrega na prome minister, kende den cinco minuut, (segun Pancho Laaf su holoshi), mester a wordo entrega. Prome minister di Aruba, Evelyn Wever-Croes, cu dolor na su curason, mester a pasa e yabi di gobernacion na esnan cu sa con pa guia nos carnaval. El a gradici tur esnan cu ta participa na e carnaval y a mustra cu tin sacrificio grandi cu ta wordo haci, mustrando na e reinanan, cu ta participa y cu ta hinca hopi tempo na e shownan cu nan ta hinca aden. Tambe na esnan cu ta sostene carnaval, sea den dje of na banda. Ta danki ni nan, ta haci e carnaval grandi manera cu e ta. Esaki tabata e antesala a e parada di mucha na Playa, cu lo sali pa 2’or di merdia.
