E control y dominio cu Minister Oduber y su partido POR tin riba gabinete Evelyne Wever Croes, ta impresionante, sigur ora cu mira e forma bisto cu e mandatario ta haci loke cu e kier y ora cu e kier, lider di fraccion di AVP, Marlon Sneek ta mustra.
“Diamars ultimo Minister Oduber a dicidi di yama un reunion publico di Parlamento, e organo cu mester controla su maneho y e maneho di e gobierno di coalicion, pa asina e trata loke su persona a yama crisis di Green Corridor.
Ningun di e tres fraccionnan cu ta sostene e actual gobierno di coalicion a haci un peticion pa e reunion aki of a manda yama riba nan propio iniciativa Minister Oduber pa e bin duna informacion na Parlamento riba su maneho cu e lo ta hibando pa e proyecto aki.
Algo cu tabata dificil tambe pa haci ya cu den un lapso di 50 dia den gobernacion, no ta mucho cos cu Minister Oduber por a informa Parlamento y loke a sosode diamars ultimo, ta un forma cla cu di e vision cu politiconan a presenta na inicio di e periodo nobo di gobernacion, no ta resultando.
Durante di e reunion tabata bisto cu miembronan di e tres fraccionnan no tabatin conocemento di loke Minister Oduber tabata trece dilanti y simplemente no tabatin oportunidad pa por a studia asina hopi documento di un contract cu tin, corda pa analisa y papia riba esaki.
Minister Oduber na varios ocasion a pone bon cla cu ta su persona a dicidi cu lo tin un reunion di Parlamento riba e proyecto historico aki di gobierno di AVP y tur loke el a bin busca ta pa miembronan di e tres fraccionnan aki, firma un mocion pa e haya un mandato cu lo facilita su persona mas placa pa haci loke e ta desea.
E momento culminante tabata ora cu Minister Oduber mes a mustra Parlamento e mocion cu su persona a sigura a wordo formula pa un comision y cual hasta e ta bisa cu e kier wak ta cual miembro di Parlamento lo vota contra di e mocion aki cu e mes a laga traha.
Un institucion asina importante den nos sistema democratico, a wordo manipula di un forma increibel pa un Minister cu ta hoga tur su coleganan di coalicion cu su experencia politico y hasta a haya e poder pa traha un mocion cu el a manda Parlamento pa wordo firma y sostene loke a pasa tambe.
Loke tabata falta na momento di votacion den e reunion di diamars, tabata pa Minister Oduber tambe wordo permiti pa vota pa su mocion y asina e lo a haya un sosten mas amplio,” segun lider di fraccion Marlon Sneek.
