Keto bay tin un presion pa loke ta e costonan pa bula entre islanan ABC. Gobierno tabata na Hulanda y despues tin cosnan andando positivamente. Prome Minister di Aruba, Mike Eman a splica cu na e momentonan aki tin diferente partner cu a logra di haya interes pa por yena e buraco aki di conexion entre Aruba, Boneiro y Corsou. Diferente di nan ta traha cu plannan independiente, pero ta buscando toch un poco sincronisacion entre e plannan aki pa locual cu bin riba pia pa un siguiente fase di comunicacion aereo entre e islanan, por ta uno duradero. Sa cu costonan pa aerolineanan ta costonan cu hopi biaha por wordo carga na momento cu tur cos bay bon. Pero na momento cu tin cierto situacionnan di contratiempo, e ora eynan por haya un aerolinea ta pasa den momentonan dificil. Esey ta algo cu tin cu evita y pa evita esey, ta traha riba un plan caminda cu e tin suficiente sosten economico financiero cu e plan tin feasibility pa loke ta su factibilidad pa por garantisa cu e ta keda un plan cu na momento cu e inicia, no haya den contratiempo despues di algun luna.
Aruba tin hopi conocemento riba e tereno di aerolinea. Hopi pionero den e area aki y treciendo nan hunto, segun e prome minister, por logra un proyecto exitoso. No kier delanta riba esaki si.
Ta pidi tambe durante e bishita na Hulanda, un envolvimento di KLM sea como socio, probablemente esey lo ta posibel, pero di un forma of otro ta asocia si den e conocemento cu nan por otorga na un operacion asina y sigur experiencia y conocemento cu nan tin.
Rol financiero
Gobierno no kier tin un rol financiero pasobra no ta un actividad cu ta particularmente algo cu Gobierno ta mira cu e por garantisa cu e fondonan cu wordo inverti den dje lo ta sigura, pasobra Gobierno su experticio ta mas den maneha condicionnan pa por tin aerolineanan exitoso, manera un aerolinea riba su mes.
Diferente esfuersonan den pasaso pa Gobierno tin un rol prominente como accionista den aerolinea toch a resulta di ALM pa Air Aruba y otronan, cu hopi dificultad y ta prefera di crea tur e facilidad, tur empuhe, tur sosten pa esnan den sector priva cu tin e conocemento, cu kier pone e capital pa haci esaki posibel, pa nan ta exitoso y Gobierno facilita y sostene esaki, segun prome minister.
Mas aerolinea
Gobierno ta kere cu tin mester mas aerolinea. E conexion entre e islanan ta hopi caro y hopi iregular. Nos ta islanan cu tin hopi necesidad pa comunica cu otro, comercialmente, familiarmente, pero tambe riba tereno di arte, cultura y deporte, por mira hopi necesidad di interrelacion entre e tres islanan cu ta papia Papiamento, tres isla cu hopi famia entre e islanan. Tin un necesidad grandi pa un conexion efectivo y pagabel, e mandatario a splica.
