Prome Minister Evelyn Wever-Croes, den compania di Minister di Finansa y Cultura, Xiomara Maduro tabata na Den Haag, Hulanda p’e firmaento di e onderlinge regeling, firma entre e cuater paisnan den reino, esta Aruba, Corsou, Sint Maarten y Hulanda.
Un tempo pasa caba Wever-Croes a firma un acuerdo caba cu COHO, cual e tabata di acuerdo cu ne. Awo esaki ta un firmamento bao di un otro nomber. Parlamento di Aruba no a duna sosten p’e ley aki pa bira un Raft. E pregunta ta ki garantia tin awo cu Parlamento di Aruba lo sostene e acuerdo aki cu Wever-Croes a firma.
Wever-Croes tin tur confiansa den e caso aki, e ta un onderlinge regeling. Esaki ta un areglo entre gobierno y gobierno. N’e momento ey e ta un responsabilidad y un espacio cu un gobierno tin pa yega na palabracion. Ta hacie tur ora y a hacie den pasado varios biaha.
Esunnan a bin prome, tambe a hacie y esaki ta cos cu como gobierno ta haci un compromiso y ta ehecut’e. Parlamento ta informa di dje. Wever-Croes a bay parlamento mas di 20 biaha desde cu e pandemia a bati na nos porta. A duna parlamento tur ‘openheid van zaken’ cu tabata posibel. No tabata posibel mes pa duna texto, aunke esaki a bay caba p’e parlamentonan, segun palabracion haci.
Parlamento ta informa desde principio cu a bin e prome CHE, despues e COHO y awo despues di e Onderlinge Regeling.
Januari ora cu a bin bek fo’i Sint Maarten cu tabatin den liña grandi un acuerdo, tambe a bay parlamento pa duna un presentacion. Manera siman pasa a duna parlamento un presentacion final y den parlamento den su mayoria a expresa cu nan ta sostene esaki y parlamento a indica den un gran mayoria, di ta hopi contento di mira cu e autonomia di e parlamento ta salvaguardia den esaki.
E ta un areglo entre e gobiernonan. Claro, ora cu parlamento tuma nota di dje y si nan no ta di acuerdo cu ne ta yama gobierno den parlamento y ta duna cuenta riba dje.
E ta un poco diferente cu un rijkswet, unda cu parlamento mester aproba. Ora cu trat’e den Tweede Kamer ta parlamento ta bay ta eynan pa vota riba dje y no gobierno.
