Gobierno a haci un apelacion pa solidaridad di e empleadonan publico y semi publico. Hopi reaccion a bin dilanti di cual e mandatario ta gradici esnan cu si ta compronde e crisis cu ta den dje y e importancia pa mustra solidaridad.
E propuesta cu Gobierno a pone riba mesa ta pa ministernan, parlamentarionan, conseheronan di ministernan y directornan di companianan estatal ta entrega 20% di salario. Pa loke ta empleadonan publico, empleadonan di companianan estatal 12.6% y pensionadonan di APFA 4.5%.
E entrega di 12.6% cu a propone e empleadonan publico, segun Prome Minister, Evelyn Wever-Croes, no ta pa tur luna. Loke nan ta entrega ta 5% di salario pa luna, mita di vakantie uitkering di juni, mita di e back to school premie di augustus, mita premie di november. Di salario 5% y e demas premie considera como beneficio secundario, ta un total di 7.6%, cu ta 12.6% di e empleadonan publico. Di e pensionadonan di SVb, AOV uitkering no ta entrega nada.
Pa loke ta e empleadonan di APFA, esnan cu a baha pension despues di aña 2014 no ta colabora cu nada. E pensionadonan di APFA y cu a baha prome cu aña 2014 ta ricibi un premie na november di 3000 algo, y Gobierno a pidi pa nan entrega mita. Gobierno ta paga e prima ey, pero awo nan tin hopi mas gasto door di crisis y mester tuma medidanan. P’esey a pidi pa corta di e bonus y esaki ta ekivalente na 4.5%.
Gobierno a purba di dialoga cu e sindicatonan y a scucha diferente preocupacion. Despues di a ricibi tur preocupacion a tende cu algun caba, pero pa atende cu tur esaki lo tuma tempo. Sindicatonan ta preocupa cu cosnan ta bayendo fout na e pais aki, manera salario halto di compania estatal. Esaki ta fout desde cu Aruba a bira un pais riba su mes na 1986, cual ta 34 aña pasa. E gobierno kier coregi esakinan pero no por haci esey.
A informa companianan estatal di esaki, Parlamento ta sostene Gobierno cu e 20%. Ta pidi sindicatonan pa coregi e foutnan cu tin na caminda, pasobra ta corigiendo. Aworaki no tin tempo pa soluciona tur e cosnan aki. Ta importante pa yega na un solucion. Segun e mandatario a purba esaki via sindicatonan di empleadonan publico, di cual a logra cu algun pero no cu tur. E ta compronde cu sindicatonan kier mira cosnan coregi prome cu ta solidaridad, pero no tin tempo. Tin e preocupacion di e empleado publico, di no por garantisa e empleado publico cu algun luna no lo por paga salario.
E Prome Minister a tuma e decision di manda e plan pa Hulanda. Den e carta aki lo informa Hulanda kico nan ta bay haci y con ta bay baha e gastonan. Asina aki por bin na remarca pa fia y paga bek sin interes na Hulanda, pero tambe pa haya e placa lihe garantisando asina aki di por paga salario, di por garantisa e sector priva cu ta afecta p’e crisis aki cu por percura un entrada p’e y famia.
