Medidanan lo keda na vigor te cu dia 28 di april y esaki ta nifica cu shelter in place ta keda valido. Tin un fin di siman largo y ainda no mag di bay lama pa recrea.
Lama por bay solamente si esaki ta pa bo salud, manera a anuncia anteriormente.
“E siman aki a haci 297 test, casi 300 test, y a haya 4 caso positivo. Tambe e siman aki 25 persona a recupera y te cu awo tin 29 caso activo. Esaki ta duna hopi speransa, pasobra ta bayendo bon. Pero no por slek. Awo ta drentando un etapa nobo tanto p’e aspecto salubridad, ordo publico, economia. Den e etapa nobo aki Gobierno mester p’e comunidad custumbra na e cambionan,” Prome Minister Wever Croes a bisa den e resumen di diabierna anochi.
E mandatario a bisa cu e cambionan aki cu ta bini cu e normal nobo ta keda pa resto di bida. Tanten cu no tin vacuna, mester tene cuenta cu no por tin aglomeracion y keda mantene un distancia di otro. Tambe ora cu e crisis pasa, no por bay bek na e tratonan di pasado di tin hopi hende riba otro. E distancia social y reglanan di higiena ta parti di e reglanan nobo. Esaki no ta pa un caminda so, pero mester aplic’e tur caminda esta na cas, trabou, scolnan, luganan publico y tur caminda. Mas lihe ta prepara p’esakinan, mas lihe por bay bek na habri cierto sectornan, segun e mandatario.
P’e fecha di 28 april Gobierno lo ta tumando cierto decisionnan, esaki tin di haber cu flexibilidad riba e medidanan cu a tuma pa preveni contagio. E weekend aki ta uno largo y p’esey e mandatario ta recorda tur hende cu e medidanan ta keda na vigor. “Shelter in Place” ta keda na vigor y no por sali for di cas, pero solamente pa algo esencial. E toque de queda ta keda na vigor desde 9:00PM te cu 6:00AM, incluso “samenscholing verbod” ta keda na vigor henter e fin di siman aki.
Gobierno ta conta cu e deber civico, e responsabilidad di cada ciudadano pa mustra cu ta mantene na e reglanan aki. Segun Minister Wever-Croes, esaki ta mustra Gobierno tambe pa flexibilisa den futuro mas lihe. Loke cu por spera despues di 28 April por ehempel por adapta e orarionan di toque de queda y esaki por bira menos ora. Por adapta e orarionan di cierre di establecimentonan y por keda un tiki mas largo. Tambe por stimula e servicio di entrega, no solamente di cuminda pero di tur cos. Esaki ta nifica cu un tienda di paña of cualkier establecimento cu ta bende algo, por haci uzo di bende online y via telefon y entrega. E tienda no por ta habri, pero si por haci entrega.
Tambe Gobierno ta trahando pa flexibilisa lista di esencial y no esencial pa mas establecimento por habri. Segun e mandatario, nan ta preparando den cuadro pa tur sector di economia di e rekisitonan minimo cu tin di tene cuenta cu ne pa bin na remarca pa habri. P’e siguiente dianan Gobierno lo ta tumando su tempo pa splica cada ciudadano kico ta e normanan nobo. Kico esaki ta nifica na cas, na trabou, cu amistadnan y etc. Te cu dialuna tur cos lo keda manera e ta y diamars 28 April, Gobierno lo bisa kico ta flexibilisacion.
