Frakshon di PAR a tuma nota di e kaso horibel di intimidashon i abuso di un menor di edat ku a tuma lugá e siman ku a pasa. Lamentabel ta ku e video di e suseso aki a wòrdu kompartí abiertamente riba diferente ret sosial, apesar di su kontenido violento i kriminal.
Ku e komunikado di prensa aki frakshon di PAR kier felisitá tur profeshonal ku a duna asistensia na e kaso aki. Personal di Kuerpo di Polis, Ministerio Públiko, Ofisina pa Bienestar di Mucha (Voogdijraad), JJIC, AJJC, Gezinsvoogdij i Slachtofferhulp. Ademas Frakshon di PAR ta rekonosé i felisitá pa e trabou enorme ku Aliansa a realisá pa via di retnan sosial konsientisá riba e importansia pa no kompartí e video.
Ku demasiado frekuensia ta lubidá di rekonosé e esfuersonan realisá pa tantu trahadó públiko, komo trahadó di NGO. Den e kaso aki spesífikamente, apesar di ku ta dia di fiesta, tur persona a duna di nan mes pa rápidamente resolvé e kaso aki, trahando te anochi lat i sierto profeshonal asta kibrando nan fakansi. Awor Kòrsou por bisa ku tantu e víktima, komo e agresornan ta kanando nan proseso individual.
Esaki no ta e promé kaso konosí di violensia kontra un menor di edat, pero si e ta demostrá e urgensia ku kual tin ku implementá e Plan Nashonal kontra Abusu Relashonal i Violensia di Mucha. Ku e Plan Nashonal den funshon tin un maneho konosí i kada aktor sa su lugá den e totalidat. Ainda tin un kaminda pa kana pa garantisá un sistema di kuido integral i sinkronisá. Pero e kaso aki a demostrá e fortalesa di trabounan konhunto i tambe e fortalesa di nos profeshonalnan públiko i di NGO.
