Mescos cu tur e 5 diferente picanan conoci bou di e marca “Aruba Heat”, awe Michel Frank di Imports 2000 & More NV orguyosamente a lansa su producto nobo, e biaha aki no ta un pica, sino un otro condimento pa cushina, “Rucu”. E compania ta existi desde aña 2008 y a crece den produccion di productonan, manera Aruba Heat Hour Sauces, no solamente pa nos localnan sino tambe pa turistanan.
“Nos grandinan semper a uza Rucu den cushina. Tabata uz’e den azeta pa dun’e color y pa prepara mayoria platonan local”, asina Michel Frank a conta awe. E ta corda cu tabata tira e simiyanan di rucu den azeta y ta crea un sabor cu hasta despues ta sigui den saus di e cuminda. “Pero pa no uz’e solamente pa tiña cuminda, nos ta prepar’e cu e polvo y a añadi ingredientenan pa dun’e un dushi sabor. Nos a mescl’e cu diferente berdura y sasonnan pa crea un producto cu no ta duna solamente color na cuminsa sino tambe sabor”.
E desaroyado di e producto a conta cu de facto a prepara Rucu pa añadi den preparacion di e cuminda. Pero, ora cu a caba di produci Rucu a bin ripara cu por uz’e trankilamente riba e cuminda na final tambe. Por ehempel riba un pisca hasa of un galiña horna y te hasta por hunt’e riba un pan bati, pa un sabor sin igual!
Maria Petit, un coki profesional y conoci pa su segmentonan “Maria ta den cushina” a sigura cu e producto nobo aki, dor di tur e ingredientenan cu ta bin den dje, ta haci awendia un of dos cuchara di e saus di Rucu ta haci milager den preparacion di cualkier cuminda. Por ehempel, pa preparacion di nos ayaca tradicional di fin di aña lo smaak hopi miho awo cu tin e producto aki riba mercado.
Michel Frank a sigura cu a traha duro e ultimo simannan y a percura cu e ta riba cashi di tur supermercado, den tur bario di Aruba. Ta nan intencion pa Rucu ta accesibel pa henter e pueblo di Aruba, como un producto produci den fabrica na Aruba y pa Aruba, un producto netamente Arubiano!
