Awe Aruba a recorda cu 157 aña pasa a libera e catibonan na Aruba. E ta mesun fecha cu nan a emancipa den henter Reino Hulandes. Na momento cu esey a sosode na 1863, Aruba tabata conta cu casi 2000 habitante y 14% di e poblacion a haya nan libertad. Cada catibo e tempo ey a haya su carta di libertad y solamente un famia a warda esaki te na e generacion. Betina Daal-Helder a entrega e documento na Archivo Nacional pa e forma parti di historia di Aruba.
Si mira den cara di e hendenan cu ta forma parti di e poblacion local, no ta mira kende ta descendiente di esclavo, segun Edric Croes (Chef Afdeling Archief Beheer en Behoud). “Riba e fecha aki, prome di juni 1863, esclavonan di tur e islanan a emancipa.” E tempo aya e compra y benta di esclavonan ta tuma luga na oficina di Notario y ta wordo considera un obheto di balor cu por hipoteca tambe.
Esclavonan nunca tabatin un fam y na momento di nan libertad a inscribi nan oficialmente como ciudadanonan liber y a haya asina pa prome biaha un fam. Asina por ehempel por bisa, cu awe 60 fam na Aruba ta celebra cu 157 aña pasa a uza nan pa prome biaha. Por menciona famnan manera Odor, Loopstok, Orman, Bikker, Paskel y Helder.
Loke cu ta hala atencion tambe ta cu e tempo aya hopi lo a pensa cu e doñonan di esclavo ta personanan di fam Hulandes, pero mayoria tabatin famnan manera Croes, Yarzagaray, Oduber, Lacle, pues famnan crioyo.
A splica cu despues di declara nan liber, hopi lihe a lubida cu un tempo tabatin esclavitud na Aruba, ya cu e poblacion a mescla, parehanan a casa y forma nan mesun famia.
Loading…
Reload document 
Open in new tab
Loading…
