Gobierno di Aruba recientemente a haci un peticion formal na Gobierno di Hulanda pa Cuerpo di Marina Real por brinda “zachte bijstand” na autoridadnan local relaciona cu e reto cu Venezolanonan purbando pa subi tera di forma ilegal y despues tambe pa mitiga e consecuencianan rond di Coronavirus. A acorda cu Mariniernan di Savaneta Kamp ta brinda sosten na e trabounan cu Warda Costa di Caribe Hulandes ta desplega na Aruba, cu ta cuida lama y nos costanan.
Pa algun dia caba ta nota e autonan militar special moviendo riba careteranan, controlando pa presencia di publico na costa den forma di placer of pa ilegalmente purbando pa subi tera. Awo e tarea a amplia mas den forma di patruya na pia dilanti y patras di e hotelnab Highrise na Palm Beach. A nota con e Mariniernan ta pasa papia cu e Security Guardnan cu ta cuidando e hotelnan pa puntra con ta bayendo, kico nan ta mira ta sosode anochi of den dia y con nan por asisti nan miho durante nan control.
Claro e bista di 6 marinier arma canando riba nos corridor turistico ta masha peculiar y ta hala atencion. E prome impresion ta spanta Bo pasobra no ta un bista comun. Mariniernan con cu bo bir’e semper ta sali pa calamidad of guera y no ta conoci mucho na Aruba pa trabounan preventivo manera esaki.
Por lo menos un Security Guard patras di un di e hotelnan Highrise a bisa nos di a keda masha contento di topa autoridad na pia combersando cu nan un rato. “Ni Polis nos no sa mira canando riba e strip aki di masha tempo pasa”.
