Diadomingo anochi a keda demostra cu den Sero Patrishi atrobe tin e grupo di hoben boca grandi. Tin cu hasta a subi dak y bay live riba FaceBook pa purba chercha di y reta Polis. Nan a invita Polisnan pa bin pa nan tira nan cu piedra. Pero e chansa aki a sali nan caro!
E Toque de Queda tin e grupo di hobennan sin educacion den un problema serio. Nan a bira incomodo y awor kier reta Polis. E ta keda te na reta pasobra en realidad nan ta hopi cobarde. Awor hasta ta yama e grupo aki “Moli Moli Gang”. Esaki ta e grupo di hobennan cu ta faya y ora autoridad drenta nan cas, ta tende cu ta abuso. Mayornan cu ta para man crusa mira an yiu manda baranca riba autonan di Polis, menasa riba FB y causa problema den bario, pero ora drenta nan cas ta tende cu Polis ta abusa. Nan mes no por controla nan yiu.
Polisnan a prepara diferente team pa drenta Sero Patrishi y pone ordo. A drenta na pia. Polisnan a move den e casnan di pueblo y cu presencia di drone y helicopter. No a topa cu e cobardenan cu boca grandi. Un conclusion tin di henter e cos aki. Aki ta trata di un grupo di hoben cu boca grandi riba FB of causa problema y sconde, pero en realidad ta un grupo di hoben “Moli Moli’ den casnan di pueblo di Sero Patrishi.
Polis no tin miedo di nan y pesey a drenta pa pone ordo. Ora bo tin boca riba FB of sconde manda baranca, bo mester ta homber tambe pa para y no sconde. Adresnan ta conoci pasobra e yamadanan ta drenta na Polis kendenan ta e cobardenan di Sero Patrishi. Bishitanan inespera por presenta cerca e grupo “Moli Moli” di Sero Patrishi.
Durante e di dos entrada den e area, a pasa banda di un cas, a topa cu un persona y a detene na altura di Sero Patrishi 17. Personal di CEA a bin buske hibe Warda di Polis. Parce esaki no ta den e “Moli Moli Gang” di Sero Patrishi.
