Prome Minister Evelyn Wever-Croes ta reacciona rib’e expresionnan di parti politiconan den oposicion riba diferente desaroyo. Ta trata temanan cu recientemente prome minister ya a trece dilanti y informa comunidad pa keda alerto pa cualkier desaroyo. E temanan aki tin atencion di Gobierno di Aruba.
Prome minister a splica cu un di e temanan cu recientemente el a trece dilanti ta encera consecuencianan cu por tin a raiz di e conflicto entre Ucraina y Rusia. Na e ocasion a pidi comunidad pa ta alerto pasobra nos no por influencia kico ta pasa na Ucraina y Rusia. Pero nos por influencia parcialmente e impacto cu esey ta bay tin riba nos. Prome minister a sigui bisa cu ta lamenta cu hustamente awor cu ta saliendo di Covid, ta bolbe drenta den situacion insigur. “Nos mester pa tur hende para hunto pa hiba nos pais dilanti, pa nos yuda esunnan cu ta bay wordo mas afecta den e circunstancianan aki. Y pa tur esunnan cu por, bin hunto y ofrece solucionnan pa e problemanan.”
Algun ehempel di e solucionnan necesario cu prome minister a duna ta:
con ta bay atende cu e prijs di Heavy Fuel Oil (HFO) of di gasolin cu ta aumentando,
con ta bay atende ora cu inflacion na otro paisnan wordo importa na Aruba y
con ta bay atende cu e retonan di turismo si acaso conflicto na Ucraina tarda y e turistanan Mericano cuminsa bira insigur si nan biaha si of no.
“Ohala cu por mira tur politico, specialmente oponentenan, yuda nos pensa con pa nos soluciona e problemanan aki. Lamentablemente na Aruba nos ta mira cu e unico cos cu oponentenan politico por haci, ta probecha di un crisis y sali ataca gobierno, Aruba a realisa esaki caba”, Prome Minister a expresa. Prome Minister sigui bisa: “Si Aruba tabata den miho situacion prome cu Covid, e lo no a dal Aruba asina duro, sinembargo tempo cu nan (oposicion) por a influencia esaki, nan a bira lomba pa pueblo y tuma decisionnan cu ta beneficia nan.
Prijs di awa y coriente
Por ehempel pa locual ta e discusion cu tin aworaki riba e tema di prijs di awa y coriente. WEB a indica cu e lo mester bay hisa su prijsnan. Gobierno a bisa cu lo haci tur posibel pa evita cu ta hisa prijs di awa y coriente. Nos a bisa WEB pa baha e gastonan prome y ora demonstra esaki, e ora ey por considera pa adapta e prijsnan di awa y coriente pero lo haci tur posibel pa evita esey. Kico oponentenan a haci na 2014 ora cos a bira malo na WEB como resultado di ‘hedging’ ekiboca cu Gobierno a haci? Oponentenan a dicidi pa hisa tarifa cu 25%. Pa e motibo aki ta pensa cu oponentenan ta preocupa pa Gobierno actual no goberna manera cu nan a goberna. Prome Minister a enfatisa ripitiendo locual Minister Glenbert Croes tambe a bisa: Lo haci tur cos posibel pa evita cu e prijs di awa y coriente mester subi. “Nos sa cu e HFO su gastonan a aumenta, pero mester bay mira con ta bay haci adaptacion den WEB y den Gobierno, pa evita cu pueblo mester pag’e. Esaki mi kier garantisa pueblo di Aruba”, prome minister a accentua.
Aumento di Schoolgeld di SKOA
Pa loke ta e tema di aumento di schoolgeld SKOA, Premier Wever-Croes a ripiti locual colega Minister Endy Croes a bisa: SKOA no a informa Gobierno cu ta bay hisa schoolgeld. SKOA ta un fundacion cu ta haya un subsidio di Gobierno di Aruba, y e tincu mantene su mes den cuadro di ley cu e lesnan cu e ta duna. Pero e ta un scol priva. Gobierno no ta di acuerdo cu e decision pa hisa schoolgeld y ta den dialogo cu SKOA pa mira dicon ta his’e y mira kico por haci pa evita esaki. Pues e ponencianan di oposicion cu ta gobierno ta hisa e schoolgeld no ta corecto y ta un otro manipulacion di parti di e oponentenan. “Gobierno lo haci tur lo posibel pa evita cu schoolgeld mester wordo aumenta”, prome minister a bisa.
Gastonan di Salud y AZV
Ademas, e oponentenan a expresa nan mes riba e tema di gasto medico y AZV, pa cual prome minister a bisa: Si berdad nos tur na Aruba ta kere cu AZV ta importante y si nos tur ta kere cu mester keda cu AZV, ban traha riba solucionnan con nos por keda cu AZV. E realidad ta cu AZV manera cu e ta awo no ta sostenibel. Premier a sigui bisa cu esaki ta algo cu a scucha AZV papia di dje y si sigui manera ta bayendo awo, aki algun aña nan lo ta failliet y lo no tin AZV mas na Aruba. Gobierno, contrario na oposicion kier mira con pa soluciona e problema y percura cu semper tin un AZV specialmente pa esnan mas vulnerabel den nos comunidad, esey ta locual cu ta trahando riba dje. Prome minister a bisa: “Actualmente cosnan no ta facil, Aruba ta saliendo di un pandemia den cual a lucha schouder cu schouder cu positivismo y cu optimismo weitando e luz na final di e tunnel. Aworaki nos ta den e luz y mi tin tur confiansa y tur siguridad, cu si nos sigui asina nos ta bay sali afo.”
El a terminsa su mensahe bisando cu na e momentonan aki Aruba mester di nos tur. Aruba mester di Gobierno y un parlamento constructivo cu ta bin cu solucion y no cu critica solamente. Ban cada persona duna nan aporte pa asina tin un Aruba mas fuerte y resiliente especialmente pa esnan mas vulnerabel den nos comunidad.
