E asunto di entrada di botonan clandestino na nos costanan mester atencion urgente. Kustwacht ta haciendo un tremendo trabou pero claramente nan so no por tin tur cos controla 100%.
Pesey mes a yega e momento pa cada departamento pone capricho un banda y asina traha hunto pa sera nos costanan 100%. No ta un secreto cu entre e grupo di Kustwacht y tambe Polis tin un guerra frieu. Sea nan no ta confia otro of nan kier score mas cu otro. Na final e problema aki ta causa cu e pueblo ta keda perhudica y criminalnan ta vence drentando den forma ilegal sin cu nan ta wordo gara. Ehempel bibo ta diahuebs marduga ora e boto Mi Fortaleza a yega na Santana di Cacho y tur hende a baha somenta. Ora cu e patruya di Polis a yega pa controla e area a bin topa e boto. Ningun hende tabata tey mas y no sa ki ora e boto a drenta. Den e boto a topa cu seis tanki di gasolin y nan tabata yen. E boto a wordo saca durante dia pa personal di kustwacht y fiscal a duna ordo pa destrui esaki na Dump. Takelwagen a bay cune. Personal di Kustwacht durante buskeda a haya tambe varios vest. Total seis salbabida cu esnan abordo a usa den e boto y benta un banda despues di subi tera. Cuanto hende a yega tera no ta conoci. Sigur seis a yega mirando e vestnan pero e por ta mas tambe.
E gasolin cu a confisca, e personal di kustwacht a bay hiba esaki pa piscadornan pober cu tin boto. Pa loke ta e lucha contra ilegalidad, por menciona cu ta bay haci un aña cu tin cuater Jeep Wrangler cla full ekipa pa asina cuida nos costanan. E autonan aki ainda ta para den garage unda a cumpranan. Ta un donacion cu a wordo haci pa asina Departamentonan atende cu cuido di nos costanan contra ilegalidad. Polis, Douane y Kustwacht parce mester a bay traha hunto riba e tema aki. Nan a cuminsa reuni desde algun luna pasa caba. Unda e cos ta pega no ta mucho cla. Mas cu 20 aña pasa Polis so tabata atende cu cuido di costa den oranan di marduga. Douane tambe tabata haci esaki. Kustwacht tambe tey y tambe ta controla costa via tera. Cu tempo e departamentonan aki no ta traha asina sera mas cu otro. Awor e mihor cos ta pa Polis, Douane, Guarda Nos Costa y Kustwacht sinta y asina discuti e diferencianan of dolornan cu tin y cuminsa pone e material cu tin den funcion pa sera tur e fronteranan. Tambe tabata tin un radar mobile cu Kustwacht a purba un biaha net prome cu gobernacion anterior a bay y el a traha hopi bon. Esey tabata pa e spotnan cu no tin reach di e radar cu kustwacht ta usando actualmente. Hasta kizas mester pone un radarkamer tambe pa Polis vigila cu hendenan serio.
Den pasado tempo di minister Rudy Croes a pone cierto hende controla radar bou di capa di Guarda Nos Costa y eynan tabata tin cierto cosnan robez cu a pone e departamento na duda. Hendenan limpi y cu curazon pa bringa ilegalidad mester ta na e funcionnan ey. Tin basta cos pasando pazuid y pesey ta bon pa nos na Aruba traha uni y evita malo pa nos isla. Spera cu e siman aki tende e minister di Husticia bisa cu porfin e jeepnan por drenta den funcion y departamentonan por activa e cuido di nos costanan. Si bo pone tres personal di cada Departamento den e proyecto, esaki lo kita e presion di personal riba e departamentonan envolvi. Bo pone tur di un solo departamento dimes esaki lo kibra un departamento. Pero algun personal di cada departamento e lo ta sigur un gran yudanza pa activa cuido di nos costa. Awor aki mes mirando loke a pasa diahuebs marduga ta trece diferente pregunta dilanti. Polis y Kustwacht ta controla separadamente den oranan di marduga den Sero Colorado. Ora cu nan tey tur e simannan aki no a topa nada. Diripente ora cu ambos ta ausente den e area, boto a drenta y baha hende y ningun alma a wordo mira na nan yegada den forma illegal. Ta mustra cu sea e mundo criminal ta cana dilanti of den e Cuerponan mes tin hende ta dunando tur informacion na e criminalnan.
