Segun director di ATIA, Michelle de Groot, siman pasa hunto cu AHATA y Camara di Comercio, a manda un carta na Gobierno, un di e varios cartanan cu nan a manda caba, urgiendo pa un acuerdo lo mas pronto posibel cu Hulanda.
Esaki, manera cu sa, tin resistencia pa firma un acuerdo cu Hulanda na e momentonan aki. Pero di parti di gobierno ta compronde cu na e momentonan aki, no tin otro alternativa. Pa september no tin placa mas.
Esey ta nifica cu no por paga ambtenaar, no por paga AZV. Consecuentemente e sector di cuido tampoco. No ta bay tin loonsubsidie, etc. De Groot a ilustra un scenario si no firma un acuerdo cu Hulanda. Sin un loonsubsidie, hopi compania lo no sobrevivi. Of nan tin cu manda mita di nan trahadonan cas pa nan por sobrevivi un paar di luna mas, of nan ta bay failliet y ta manda tur trahado cas.
Pa e siman cu por lo menos 15 mil hende lo perde riba termino hopi cortico, si loonsubsidie cay afo. Esey ta loke ta wantando hopi compania na bida awor aki. Ademas e hendenan aki, sin FASE, ta bay cas sin ningun ayudo financiero. Esaki ta riba esunnan cu ya caba ta sobreviviendo riba FASE y FASE ta cabando, manera cu a anuncia caba.
Sin fondo di AZV, e sector di cuido no lo por garantisa un cuido di calidad. Sin placa pa paga ambtenaar, mester corda cu bao di ambtenaar ta cay tambe esunnan uniforma, cual ta polis, duana, guarda nos costa. Esey kiermen no lo bay tin orden publico, cual ta algo hopi serio. No lo surgi solamente un crisis economico, pero tambe uno social. Sin orden publico y insiguridad, nos turistanan tambe lo keda sin bin bek pasobra esey ta e rason mas grandi cu nan ta bin Aruba. E siguridad cu tin akinan.
Nos pilar economico tambe lo tambalea mas ainda. Ora cu urgi gobierno pa yega na un acuerdo cu Hulanda, no ta solamente pensando riba comercio. E ta pensando riba Aruba en general. Riba esun cu ta perde trabao. Esun cu no ta bay tin di come na fin di luna. Esnan cu no por haci uzo di cuido medico. Riba nos economia en general. E topico di autonomia ta uno cu ta keda bin dilanti y cu ta uno sumamnte importante. No ta bisa cu esey no ta di importancia.
Pero Aruba awor aki ta sangrando y di un manera of otro, nos mester yuda Aruba. E problema mas grandi cu ta mira ta e desconfiansa entre e dos paisnan, cual ta di compronde. Hopi cos a pasa, segun de Groot. Pero ta hopi importante pa traha riba e relacion di confiansa awor aki. Awor aki, e unico opcion ta confia cu Hulanda por yuda nos sali for di e crisis aki, na un manera mas fuerte. Ademas di esey awor aki e situacion ta uno hopi negativo, hopi yena di incertidumbre y comercio mester di un luz na final di e tunnel. Ta e unico manera cu lo inyecta confiansa den economia y cu lo haci inversionnan pa pone e economia draai atrobe. Pa ATIA ta importante yega na e acuerdo ey cu Hulanda.
