Relaciona cu e temporada di campamento, cu ta inicia diadomingo awor dia 2 di April, Altocomisario di Polis, drs. Ramon Arnhem ta conseha comunidad pa mantene na e regla- y condicionnan stipula pero tambe pa tene precaucion pa e temporada aki cu biento fuerte y lama cu por bira bruto. Siguridad di cada ciudadano ta e prioridad di Cuerpo Policial Aruba.
Pa 12:00 di merdia, diadomingo awor dia 2 april 2023, por cuminsa campa. Kiermen riba e fecha y ora stipula ta permiti pa pone trailernan y tentnan riba nos beachnan. Tur obheto cu wordo poni prome cu e fecha y orarario stipula lo wordo kita pa polis. E ultimo dia di campa lo ta dia 16 april 2023.
Despues di campamento tur obheto mester wordo kita for di beachnan. Si esaki NO sosode polis lo kita esakinan riba gasto di e campado. Un yamada ta bai na un y tur pa mantene nos beachnan limpi. Deposita tur desperdicio den bari di sushi of den saconan di plastic, comporta nos mes y pasa un bon temporada di campamento sin ningun problema. Extra condicion a wordo añadi na e permiso.
Tene cuenta cu e siguiente condicion cu nos ta splica aki bao:
- Ariba e santo blanco di e beachnan, bao ningun circunstancia, ta permiti pa haci B.B.Q., na otro parti solamente por haci B.B.Q. cu B.B.Q. pit di gas.
- Tent y trailernan cu ta uza pa campa mester ta den bon condicion. Nan mester ta poni por lo menos 10 meter di e orilla di lama y nan mester ta poni por lo menos 5 meter for di e caminda publico. No cumpli cu e regla aki, polis lo kita nan.
- No ta permiti bao ningun forma pa reserva tereno pa campamento.
- Tent, trailer y otro obhetonan cu ta uza pa campa no por pone riba otro luganan cu ta e luganan cu ta destina pa esakinan y cual luganan ta destina pa Gobierno.
- Den e tentnan/trailernan mester tin suficiente recursonan pa loke ta trata dunamento di prome auxilio. (E.H.B.O.)
- Ta prohibi pa pone na tent/trailer, obheto- of plachinan cu no ta cuadra cu moralidad.
- E campamento mester sosode conforme e condicionnan bao di cual a otorga e permiso.
- Ta prohibi pa core cu vehiculonan di motor, bicicleta, cabay y garoshi riba beach y principalmente na luganan caminda ta destina pa publico.
- Ta prohibi di pega candela riba beach.
- Ta prohibi di bende cuminda, softdrinks, mixdrinks, of cualkier otro tipo di articulo riba beach, sin permiso.
- Por toca musica solamente for di den e trailer of tent den siman te 10:00 p.m y den weekend te cu mey anochi di tal manera cu no ta molestia otro campadonan. E uzo di sound system/emplifiers etc. ta permiti solamente si otro campadonan no ta sinti molester di esaki.
- Ta prohibi pa kap mata, sin permiso.
- Ta prohibi pa core cu boto y pa ankra esaki den e zwemzone tambe ta prohibi pa mara boto na boeinan cu ta destina pa scheepvaart.
- Ta prohibi e uzo di pallet y carton riba beach. No cumpli cu e regla aki polis kita esakinan.
- Ta prohibi pa uza e beach of e palo di coconan como toilet.
- Ta prohibi pa tin cabay y cacho riba beach.
- Ta prohibi pa e campadonan uza e hutnan pa nan campa, mester laga nan liber pa e personanan cu ta bin pasa dia.
- Bao ningun circumstancia mag di susha e beachnan. Boternan kibra of splinter di glasnan no mag di wordo laga atras riba beach, ni tampoco pa tira esakinan den lama. Esaki ta conta pa desperdicio tambe.
- E permiso no mag di wordo pasa pa otro persona.
- E poseedo di e permiso mester tin esaki den su tent/trailer na un caminda visibel pa polis.
- E poseedo di e permiso mester tene cuenta cu e tin solamente derecho riba e luga di campa durante e tempo cu efectivamente e ta campando, prome cu esaki bo no mag di reserva, marca, pone cabuya ect.
- E poseedo di permiso ta keda responsabel pa cualkier daño na otronan debi na existencia di su tentnan/trailer of otro obheto.
- Indicacionnan di polis duna na interes di orden publico y siguridad di persona, bienes y basa riba moralidad mester wordo sigui estrictamente.
- Ta prohibi pa usa e hutnan pa campa, nan ta keda liber pa e usuarionan den dia.
- Esun cu no actua conforme e condicionnan bao di cual e permiso a wordo otorga ta wordo considera di a actua sin permiso. E permiso e ora ey ta wordo revoca y bo por haya un multa.
Un recordatorio pa tur campadornan cu e ultimo dia pa campa ta dia 16 april 2023 Sigui tur reglanan y sigur bo lo pasa un temporada dushi. Nos di Cuerpo Policial Aruba lo controla durante campamento na tur parti di nos isla.
