Diamars atardi alrededor di 6:30 pm polis a presenta na un cas den Rooi Koochi p’un problema cu a bay fo’i man. Segun informacion, ta trata di dos homber cu pa un motibo of otro kier a hala otro cu conopi. Alcohol a hung’un rol grandi den e discusion aki. E problema a bay asina leu cu segun un mama; e otro homber ta cera den camber cu un arma di candela. Parce e hombernan aki ta ruman di otro.
Na yegada di polis a logra detene un di e hombernan aki, e otro cu ta supuestamente arma a logra huy. Polis a keda vigila e area pero no a topa cu esun arma. Mas den anochi alrededor di 8:10 pm polis a presenta na Rooi Koochi #51 caminda cu segun testigonan, a mir’e rib’e tereno.
A haci uzo di team di aresto, K9 unit y polis di San Nicolas pa haci un buskeda na e dicho cas. E doño di e cas a duna polis autorisacion pa busca den su cas. A haci un buskeda grandi tanto den e cas como rib’e tereno, pero no a topa cu e homber arma.
Pa awo, polis lo ta atento pa e homber aki. No ta descarta cu den e proximo oranan lo pone man riba dje. A haci uzo di team di aresto mirando cu ta sospecha cu e homber tin arma di candela den su poder.
