Un chauffeur cu a falta respet riba caminda a keda deteni. Polis a bay na e rotonde nobo na Tanki Leendert. Varios biaha Polis a bay dialuna anochi, pasobra un actividad a hala hopi hende. Hopi brommer y hende tabata causa problema pa trafico constantemente. Segun Polis e grupo cu ta core riba brommer entre otro ta causa problema pafo.
Ora cu mas yamada a bolbe drenta ta basta Polis a bay atrobe. Na dado momento Polis a mira con un chauffeur a core cu su Suzuki Jeep cora na un forma iresponsabel. A bay su tras y a pare poco mas panort. Pero esaki no a bay facil.
Hasta tiro a cay pa calma e situacion ora cu Polisnan presente a haya nan mes den preta pa metemento di otro hende. No por a haci otro cu saca nan arma reglamentario y los tiro di advertencia pa mustra e publico cu no tin wega y lo actua cu man duro si ta necesario.
Pa colmo a bin resulta cu e chauffeur iresponsabel ta un ambtenaar, un Duanero. Polis a detene y tabatin manera aglomeracion pa cual a pidi refuerso mesora.
Basta unidad di Polis a yega na e sitio y asina core cu esunnan rond pa e detencion por a trankil. Polis a pidi dogcatcher y a hiba e sospechoso Warda di Polis na Shaba. E auto a bay Warda di Polis tambe riba takelwagen. Probablemente e chauffeur lo habri aña nobo cera den cel na Warda di Polis na Shaba, na Noord.
